Tuir Prezidente Comisaun Nasional Eleisoens (CNE) Dr. Faustino Cardoso katak atu eleisaun jeral prezidensial la’o ho susesu, paz no estabilidade presiza kontribuisaun no partisipasaun maximu ema hotu nian.“Labele identiku deit ba Sekretariadu Tekniku Administrasaun Eleitoral (STAE) no CNE tanba eleisaun ne’e povu nian,” hateten Prezidente Cardoso, semana kotuk (17/02) iha Kaikoli Dili.
“Ami so fasilita deit atu oinsa povu sira bele vota ho diak,”.
Tuir nia, Partidus Politiku (Parpol) sira, liu-liu Kandidatu Prezidente (KaPrez) sira tenke hatudu sira nia fiscal, sira nia ema atu akompanha prosesu tomak.
Hahu husi Nasional to’o Distritu to’o loron votasaun akompanha prosesu votasaun ba vota oinsa, konta oinsa, halo apuramentu iha Distritu to’o iha Nasional akompanha nafatin.
“Atu nune’e ita hotu bele asegura eleisaun ida ne’ebe la’o ho diak no mos susesu,se ita hotu halo tuir hanesan ne’e eleisaun ne’e bele susesu no sei la’o diak liu tan kompara ho tinan 2007 ,iha 2012 eleisaun ne’e sei la’o diak liu tan,” nia esperansa.
Atual Dosente Fakuldade Sosial iha Universidade Nasional Timor Lorosa’e (UNTL) ne’e husu mos ba iskais sira husi Parpol sira, Observadores tantu Nasional no Internasional atu servisu hamutuk, tau liman hamutuk nune’e eleisaun ne’e bele la’o diak.
“Ami husu ba Fiskal sira, Media sira ne’ebe hetan ona treinamentu tenke hala’o servisu ne’e ho professional, husu mos ba kandidatu sira tenke fo apoio logistic ba fiscal sira atu nune’e bele halo sira servisu ho hakmatek no servisu ho diak,” Prezidente CNE husu.
Entretantu tuir Diretor Jeral STAE, Tomas do Rosario Cabral hateten eleisaun ne’e atu hari Estadu foun ida se atu hari estadu foun ida presiza hari estadu ida ho kualidade.
“Husi Stae nian mak recruta observadores,Brigadista no fiskais sira ,no mos jornalista sira atu ne’e bele halo obsevadores sira iha tempo elisaun nian,” nia katak.
