Timor-leste apoiu orsamentu US$ 3.000 liu husi Fundasaun Alola (FA) ba vitima nain 10, hodi hadia sira moris.
“Hau kontente tebes hola parte iha serimonia donator ida ne’e no hau hakarak informa ba entidade hotu ne’ebe marka prezensa iha fatin ida ne’e katak lori governu Thailandia nia naran ami apresia tebes ajuda feto no labarik vulneravel sira sai husi problema ne’ebe sira infrenta (vitima Violensia Domestika) no ami prontu hamrik iha imi nia sorin hodi suporta dezenvolvimentu Timor –Leste,” dehan Embaixador Thailandia iha Timor-Leste, Suraphan Boonyamanop, semana kotuk (22/02) iha salaun Fokupers Farol Dili.
Tuir Boonyamanop, dalabarak mane halo violensia ba feto tanba tuir kultura Timor nian mane mak iha poder iha uma laran maibe kultura ida ne’e hamate dezenvolvementu feto no hamosu diskriminasaun ba feto iha area ekonomia, social inklui mos asesu ba informasaun, fasilidade saude no merkadoria.
“Espera katak ho apoiu ida ne’e bele suporta sira nia moris lor-loron nian,” nia esperansa.
Iha lidun seluk Presidente Board Fundasaun Alola, Kristy Sword Gusmão iha nia diskursu katak sira agradese tebes ba apoiu solidaridade liu husi sentimentu embaixador Thailandia nian ba feto maluk sira ne’ebe sai vitima violensia domestika.
“Ho apoiu ne’ebe sira fo hau espra katak bele ajuda ita bo’ot sira atu dezenvolve abilidade no fo ki’ibit ba ita atu jere osan ne’ebe ho montante ki’ik hodi hari fila fali ita nia moris iha futuru no oan sira nia futuru diak liu tan atu hamenus sira nia idepedensia ba sira nia kaben,” dehan Kristy Gusmão.
Iha okaziaun ne’e mos nia fo parabens ba Fokupers no Fundasaun Alola ne’ebe durante ne’e servisu makas tebes fo apoiu legal ba feto maluk sira ne’ebe hasoru difikuldade oioin iha sira nia moris lorloron. Fundasaun Alola sei fahe apoiu ne’ebe sira hetan ba organizasaun feto seluk inklui mos mehi fundasaun Alola nian konaba mundu iha hakuak feto nia kontribuisaun no labarik sira nia interese.
Iha serimonia donator ne’e partisipa mos husi Directora Nasional Reinsersaun Ministerio Solidaridade Sosial, Antonia Carmen Da Cruz lori governu nia naran hato’o agradesementu ba Governu Thailandia liu husi Embaixador Thailandia iha Timor-Leste ne’be fo ona apoiu solidaridade atu hadia feto maluk sira ne’ebe sai vitima violensia domestika nia moris iha futuru diak liu tan.
