Secretaria Estadu Promosaun Igualidade (SEPI), Idelta Maria Rodrigues, hateten tuir dadus husi Demographical Survey Statistic hatudu katak maioria populasaun feto Timor-leste ka 38 pursentu hetan violasaun fisika no violasaun sexual.
“Sira ne’e hahu kedas husi tinan 15. Ida ne’e problema ida nebe serious tebes ba ita hotu,” dehan SE Rodrigues, semana kotuk (23/02), iha Salaun Delta Nova, Dili.
Tanba ne’e, nia parte husu ba entidade hotu, liu-liu instituisaun ne’ebe relevante, importante atu servisu hamutuk hodi kombate no luta hasoru violensia hasoru feto.
Iha biban hanesan Diretora Forum Komunikasaun Feto Timor-Leste (Fokupers) Maria Barreto rekonese katak oras ne’e dadaun numeru violensia domestika aas tebes.
“Ne’e akuntese tanba fen sira oun feto sira konsidera hanesan educasaun husi la’en sira antaun sira tenki simu tanba karik sira halo buat ruma salah iha uma laran mak hodi nia la’en baku,” dehan Diretora Barreto.
Tanba ne’e, tuir nia desiminasaun informasaun kona ba lei Violensia Domestika ne’e importante ba komunidade sira nune’e sira bele kumpriende katak hahalook violensia ne’e krimi publiku.
