Fatin hakmatek nia funsaun mak atu fo ajuda tratamentu mediku, examinasaun forensika ba vitima ne’ebe hetan assaltu sexual, violensia domestika no abusu ba labarik. Fatin hakmatek mos fo kouseling ba vitimas no akompanha vitima sira ho durasaun tempo ne’ebé limitadu ka provizoriamente.
“Tamba saida maka ami hakarak loke uluk uma mahon iha Disitrito Oe-Cusse ne’e tamba bazea ba esperensia iha tinan 2004 Fatin Hakmatek halo tratamentu ba la barik feto ida ho idade sanulu resin hat, ne’ebé hetan atakasaun violensia sexsual. Nia tardi oitoan atu hetan asistensia saúde tamba sei desloka hosi Distrito Oé-usse ho ro han tempo barak afinal labarik iha kanek internal ne’ebe prezisa hetan tratamentu ho emergensia,’’ Director Interino Dos Santos hateten.
Fatin Hakmatek oras ne’e harii ona iha iha Distrito Dili iha Hospital Nasional Guido Valadares, iha Suai, Maliana no agora daudauk iha mos Oé-Cusse.
Director dos Santos informa tan katak hosi 2010 to 2012 Fatin Hakmatek hotu iha nasaun laran konsege fo asistensia ba kliente hamutuk 1,145 no hosi numeiro ne’e feto domina liu hafoin maka labarik kik. Alende ne’e Fatin Hakmatek mos hetan referensia vitima Violensia Domestika 200 resin inklui 80 pursentu kazua simu referral hosi Polisia Nasional PNTL no mai hosi Distritus.
“Numero klientes hosi tinan 2010 ne’e sae makas tebes tamba tuir ami nia hare hanesan rezultadu hosi aprovosaun Lei Violensia Domestika iha 2010,” nia haktuir tan.
Iha parte seluk seluk Diretor Geral Ministerio Saúde (MS), Agapito Da Silva Soares, espera katak ho presensa Fatin Hakmatek ne’e bele ajuda ona governo li-liu MS atu fo asistensia saude ba vitima sira.
“Esperansa boot ida maka ita tau ba Fatin Hakmatek ida ne’e hodi tulun vulneravel, sira ne’ebe hetan violensia, violasaun oi-oin deit, atu hetan netik tulun oitoan tamba dala barak fo asistensia ne’e laos fasil ida,” dehan MS DG Soares.
Entertantu Reprezentanti Ministerio Solidaridade Social, Direktora Carmen Da Cruz, louva ho esforso makas PRADET tamba bele realiza Uma Hakmated ida iha Oé-Cusse atu nune bele fo primeira assistensia ba vitima sira.
‘’Ita hotu hotu tenke agradese ba esforsu makas hosi PRADAET, ne’ebe maka servisu makas hodi harii safe house iha rai ketan Oe-Cusse, atu nune waihira iha vitima la presiza atu to Dili ho nia viajen naruk tebes.”
Direkotra da Cruz mos apela ba entidade hotu atu bele tau matan ba Fatin Hakmatek hodi nune bele utuliza fasilidade fatin hirak ne’e ho diak tamba wainhira atu realiza Fatin Hakmatek ne’e PRADET halo servisu makas tebes hodi buka apoiu hosi doadores sira.
Iha fatin hanesan Vincent Ashcroft, Reprezentante AUSAID iha Timor-Leste ne’ebé hanesan doador prinsipal ba estabelesimentu Fatin Hakmatek Oe-cusse hateten katak Governo Australia iha nafatin komitmentu hodi tulun povu Timor-Leste, iha sektor hotu-hotu, li-liu atu hamenus Violensia Domestika.
“Hare ba numero Violensia Domestika aas oitoan, tan ne’e bele iha impaktu social no ekonomi negativo ba vitima maibe ba komunidade hotu. Ami Governo Australia liu hosi program Justice Facility apoiu fundus kik atu estabelese Fatin Hakmatek iha Timor-Leste ho montante US$131.000 inklui material,” hateten Reprezentante AUSAID Ashcroft.
Inaugurasaun ba fatin foun ne’e halao hosi Diretor Jeral Ministerio Saúde Agapito Da Silva Soares ne’ebe akompanhado hosi reprezentantes hosi Ministerio Solidaridade Social, Miniterio da Justisa, Prokuradoria Geral da Republica, PNTL, Ajensia Nasoens Unidas iha Timor-Leste, Embaixador Australia no Espanha no reprezentante Igreja Katolika no Sosiedade Sivil no mos komunidade Distritu Oe-cusse.
