Maske governu liu husi Konselhu Ministru (KM) bandu ona grupu arte marsiais sira atu labele eziste iiha rai laran maibe iha parte balun Xefe Estadu (PR) ba halibur fali grupu arte marsiais sira hanesan akontese iha Distritu Ainaro hodi fo apoiu ba nia kandidatura e ida ne’e hamosu lamentasoens husi membru Parlamentu Nasional sira.
Deputadu Manuel Tilman, iha nia deklarasaun iha plenaria Parlamentar hateten, Xefe Estadu rasik bainihra vizita iha Distritu Ainaro halibur hotu grupu arte Marsiais sira hodi dehan Indonezia husik hela arte marsiais sira iha Timor, atu Timor sai nasaun ne’ebe diak.
“Indonezia husik hela arte marsiais iha Timor atu ita sai instavel para aban bainrua ita la sai estadu failadu,” hateten Deputadu Tilman.
Tuir nia, arte marsiais sira tenki iha dignidade, lalika fo ulun fatuk tun sa’e hodi ema sama hanesan fali plastiku.
“La’os hau mak dehan karik buat ne’e televizaun mak fo,” nia haktuir tan.
Entertantu Deputadu Agostu Tara iha nia intervensaun hateten, hafoin governu bandu atu grupu arte marsisias sira labele hala’o sira nia atividade durante tinan ida, situsaun la’o hakmatek.
“Estrada ita kalan la’o ema la iha, ida ne’e mak realidade ba nasaun ne’e,ida ne’e mak estabilidade mais ita koalia fali buat seluk ita hakarak kria fali instabilidade,” Tara dehan.
Iha fatin hanesan Deputadu Pedro Martires da Costa, senti triste tanba defende fali arte marsiais sira ninia atividades.
“Arte marsiais mai provoka situasaun nebe kria instabilidade iha ita nia rai laran, ne’e Governu nia desizaun nebe justu, aseitavel e husu sosiedade tomak atu hapara sira nia atividades,” nia sujere.
