Atu hasa’e kapasidade no abilidade iha setor ekonomia ba feto vitima Violensia Domestika (VD), Fundasaun Alola (FA) no Forum Komunikasaun Feto Timor-Leste (FOKUPERS) sei oferese treinamentu negosiu baziku ba sira nain 10 nune’e labele dependente ba sira nia la’en.
“Dalabarak kazu ruma akontese no lori to’o iha Tribunal ita labele foti desizaun ida tanba deit ita laiha kbi’it ekonomia rasik,depende deit ba ita nia kaben entau ho treinamentu ida ne’e atu hasa’e kunesementu atu maneija orsamentu ki’ik oan ne’ebe mai husi doadores sira maske ki’ik maibe ita kuidadu didiak nia sei bo’ot,” dehan Kordenador Uma Mahon FOKUPERS Judit Ribeiro da Conceicao, semana kotuk (22/02) iha Salaun Fokupers Farol Dili.
Tuir Kordenador da Conceicao, orsamentu ba planu ida ne’e hamutuk US$ 3.000 ne’ebe apoia husi Embaixada Thailandia iha Timor-Leste.
Iha lidun seluk Economic Development Program Manager,Cecilia da Fonseca, hateten orsamentu ne’e ba duni vitima sira maibe labele fo direitamente sen iha treinamentu tanba orsamentu ne’e bele faila bainhira laiha treinamentu ruma ba feto maluk sira antes jere orsamentu ne’e ho diak.
“Ami nia hanoin bainhira fo orsamentu ne’e ba sira ami hala’o treinamentu manejementu no operasaun orsamentu ba sira nune’e bainhira sira tu’un ba iha distritu bele hala’o negosiu ida ho fundus ki’ik ne’e ho susesu no bele fo benifisiu ba sira hodi hadia sira nia moris iha futuru no supporta oan hodi hetan edukasaun ne’ebe sufsente,” dehan Fonseca.
Nia hatutan, ho orkada ema nain ida sei hetan US$ 250,00 antes sira simu osan ne’e sei hala’o treinamentu durante loron rua ne’e importante tebes atu hatene no identifika negosio prioridade saida mak bele loke iha distritu no sub-distritu sira tanba vitima balun mai husi area rurais no mateira ne’ebe sei koalia iha treinamentu ne’e mak konaba atu halo operasaun manajementu negosiu ki’ik no oinsa atu rai osan ne’e iha khas tanba sira mak sai aman no inan ba oan sira bainhira kaben abandona sira.
“Treinamentu ne’e importante tebes atu hamosu planu atu jere osamentu ne’ebe ita hetan ho didiak hodi bele hetan benefisiu ne’ebe diak se laiha treinamentu laiha planu entau ema ida mai dehan ba hafolin maun ida ne’ba hasai fali osamentu ne’e lalos entau presiza treinamentu no planu ne’ebe klean,” dehan Directora Nasional Reinsersaun Antonia Carmen da Cruz.
