Komandante Unidade Polisia Tranzitu Nasional, Inspector Xefi Antonio L.C. Soares hateten ba motorizadas ne’ebe laiha lampu no espelhu sei hetan sansaun multa US$ 60,00.
“Ba motorista ne’ebe mak sa’e motor ou lori motor maibe laiha espelhu no lampu, liu-liu iha tempu kalan ne’e pelanggaran ida, tanba ne’e bainhira sira la kumpri regras ne’e sei selu multa US$ 60,00,” hateten Komandante Soares semana kotuk (17/02) iha Kaikoli Dili.
Tuir nia, regras ne’e hatur iha artigu 58/II lei tranzitu nian hodi regula motorist sira ne’ebe lori motor ka kareta maibe laiha espelhu no lampu.
Komandante ne’e hatutan, total motorizada ne’ebe konsege prende hamutuk 15 tanba laiha lampu.
“Depois sira selu molta no haruka monta kedas ahi maka lori fila motor,” nia dehan.
Entretantu Deputadu Agustu Tara hateten, polisia tanzitu tenke halo kontrolu ba motorizada ne’ebe laiha lampu no espelhu.
“Hau akompanha durante ne’e saida mak akontese Timor ne’e, liu-liu iha Dili nebe joven barak mate, tohar, tanba halai kalan la uza lampu e mos balun laiha espelhu, polisia tenke fo atensaun ba ida ne’e,” nia dehan.
