Francisco Xavier do Amaral moris iha Turiscai, Distritu Manufahi, iha 1937. Nia eskola iha Colegio Soibada no sei konsegue servisu nudar Professor Latin molok iha 1974 nia sai fundador ba Associaçao Social Democratica Timorense (ASDT) ne’ebe lidera partido FRETILIN ne’ebe nia mos nudar membru fundador.
Iha 28 Novembro 1975, Francisco Xavier do Amaral, proklama lori naran Comite Central FRETILIN, Independencia ba Republica Democratica Timor-Leste, no sai nudar Timor-Leste primeiro Presidente da Republica.
Iha loron 7 Dezembro 1975 forsas armadas Indonesia nian invade Timor-Leste.
Forsas Indonesia kaptura saudozo Xavier do Amaral no lori ba dadur no servisu forsadu iha Jakarta, Indonesia, to’o nia fila fali mai Timor-Leste hafoin ukun rasik aan no iha 2000.
Nia sai nudar Membru Parlamentu Nacional iha 2001 no hetan nomeasaun atu sai nudar Vise Presidente iha 2002.
Xavier do Amaral compete ba fatin Presidente da Republica iha Eleisaun Presidencial iha 2007 maibe la hetan fatin tanba povu hili Jose Ramos-Horta sai nudar Presidente da Republica.
Ba Eleisaun Presidencial 2012 Bloko Proklamador mos hili Xavier do Amaral nudar sira nia kandidatu presidensial maske nia moras ona.
Xavier do Amaral mate iha loron 6 Marsu 2012 hosi moras kankru intestine iha Hospital Nacional Guido Valadares iha Dili haleo hosi familia ho nia apoiantes no simpatisantes ASDT nian no nasaun tomak.
Primeiro Ministro Xanana Gusmao iha nia deklarasaun lori naran Governu hato’o nia kondolensias ba familia saudozu Avo Xavier on ba nasaun tomak.
“Ohin ita lakon figura historiku ba ita nia nasaun ne’ebe dedika nia vida atu servi Ema Timor-Leste nian no fo nia vontade tomak atu suporta harii no hametin ita nia Nasaun. Ita Ema hotu lutu hela tanba lakon Poclamador no Primeiro Presidente da Republica,” hato’o PM Gusmao.
Kona ba okaziaun ne’e mos lori naran partidu FRETILIN, Secretario Geral Partidu, Mari Alkatiri hateten katak FRETILIN oferese nia kondolencias ba familia enlutada tomak Francisco Xavier do Amaral nian.
“Hau rona informasaun ne’e bainhira hau iha Maubisse no hau laran susar tebes. Avo Xavier halo parte ita nia patrimonio ita nia luta ba libertasaun nasional, nia fundador nasaun ida nee mos…Nia nasionalista ida ke bele dehan metin tebes. Ho nia mate ita bele dehan ita lakon ema ida ke diak, ita lakon lider ida ke diak, ida lakon lider ida ke consistente,” hato’o FRETILIN SG Alkatiri hosi deklarasaun ba publiku.
Governu Timor-Leste aprova rezolusaun ida deklara loron tolu Lutu Nacional hafoin Proclamador Independensia Xavier do Amaral nia mate.
Francisco Xavier do Amaral, Avo Xavier hakoi iha Cemiterio Jardim Herois Metinaro, Dili, iha loron 08 Marsu 2012.
