Atu projetu empregu rural bele la’o diak no ho kualidade, Sekretariu Estadu Formasaun Profesional e Empregu (SEFOPE) halo enkontru ho Administrador sira husi 13 Distritus, Kordenador Nasional no Regional nune’e bele identifika fatin ne’ebe prioridade liu atu hetan projetu ne’e.
“Sorumutu ne’e importante tebes tanba komunidade barak mak hato’o proposta mai iha SEFOPE, ne’eduni ami hakarak responde ba proposta sira ne’e hotu maibe fila fali ba iha Administrador Distritus atu hare prioridade ne’ebe iha tanba projeitu ne’e bazeia iha Suku no Aldeia entau mai husi administrador distritu no sub-distritu,” hateten SE. Bendito Freitas, semana kotuk (06/02) bainhira halo enkontru ho Administrador 13 Distritu iha Salaun Enkontru SEFOPE, Kaikoli, Dili.
Alennde ne’e, SEFOPE mos halo sorumutu ne’e ho Ministerio Finansas (MF), Sekretario Estado Obras Publika (SEOP), no Polisia Nasional Timor-Leste (PNTL) hodi halo operasional ba pagamentu nune’e implementasaun bele la’o diak ho tempu ne’ebe limitadu tebes.
Enkuantu total orsamentu ba projetu ne’e tinan ida ne’e hamutuk US$ 20 milioens tanba ne’e SEFOPE hakarak halo koredenasaun ne’ebe efetivu husi nivel nasional to’o iha distritus para iha balansu ne’ebe ekelivre atu bele evita duplikasaun ka violensia iha baze.
SE. Freitas afirma, kada sub- distritus SEFOPE sei aloka orsamentu ho montante US$ 150 to’o 200.000 konforme nesesidade ne’ebe atu responde ba proposta ne’ebe komunidade sira hatama.
Iha lidun seluk, administrador Distritu Aileu, Martinho Sequira Alves Matos hateten katak komunidade iha baze barak mak hein hela implementasaun projeitu empregu rural ne’e maibe sira perkupa ho implementasaun projeitu $3 iha tinan uluk tanba akontese problema oioin entre komunidade.
“Husu ba equipa teknika husi SEFOPE no koordinador Nasional no Regional atu bele hamamar an tu’un ba iha baze atu nune’e bele halo kordenasaun ne’ebe diak ho administrador distritu sub-distritus no lideransa komunitaria sira nune’e iha tempu implementasaun labele akontese violentu ruma,” dehan administrador Matos.
Iha oportunidade hanesan administrador distritu,Manatutu, Gaspar Da Silva informa katak nudar administrador distritu sira pronto atu apoiu politika SEFOPE nian atu implementa projeitu empregu rural iha baze tanba projeitu ne’e laos povu hetan osan deit maibe sira mos bele asesu estradas atu bele utilize hodi lori produtu local ba iha merkadu.
“Projeitu ne’e inportante tebes signifika katak fo benifisiu ba ita nia inan aman sira iha area remota no sira rasik mak sei kontribui ba projeitu ne’e rasik no sira mak sei sente benefisiu husi estarada ne’e ba sira nia komunidade,” dehan Administrador da Silva.*
