Diretora Ezekutiva Rede Feto (RF) Jacinta Luzinha hateten mesmu lei fo liberdade ba feto atu involve aan iha vida politika maibe realidade involvement feto iha setor ne’e menus tebes tanba fator kultura patriarka ne’ebe sei kesi metin feto sira.
“Ita hare fila-fali ba ita nia kondisaun Timor, ita nia sistema patriarka nebe maka’as tebes fo dominasaun mane iha parte hotu-hotu antaun feto nia fatin iha uma iha area domestika nian deit la’os iha area public, ida ne’e dala barak limita ita feto labele involve no asesu buat nebe maka iha public i ne’e sai obstaklu bo’ot ba feto atu bele kapasita sira nian an,” hateten Directora Luzinha, semana kotuk (13/02).
Nia hatutan, tanba kultura patriarka nebe maka sei kesi nafatin, halo maluk feto balun susar atu assesu ba formasaun no treinamentu no kapasitasaun bar-barak nebe mak hala’o iha rai laran.
Iha biban seluk Deputada Ilda Maria da Conceicao, konkorda ho hanoin husi Diretora RF nian tanba ne’e nia parte husu ba feto maluk sira atu kore aan ona husi kultura patriarka ne’e.
“Maluk feto sira tenki komesa kore aan ona tanba se hanesan uluk mak sei lakon oportunidade atu partisipa iha vida politika no feto atu la’o sai ba liur ne’e defisil teb-tebes,” nia katak.
Deputada ne’e hatutan, alende kultura patriarka mos dalaruma inan-aman la hatan atu fo sai liu-liu wainhira sira kaben tiha.
“La’en lahatan atu sai, loron kalan iha uma deit, ne’e maka sai hanesan condiasaun nebe maka limita feto sira atu hasai sira nia hanoin no susar atu apresia saida maka sira hatene, so lolos maluk feto barak mak potensial mais tanba condisaun ne’e maka dificulta feto sira,” membru Grupu Feto Parlamentar ne’e (GMPTL) kestiona.
