Atu feto maluk sira labele dependente liu ba sira nia la’en iha parte ekonomia nian, Sekretaria Estadu Promosaun ba Igualidade (SEPI) pronto fo apoiu orsamentu ba feto maluk sira liu husi proposal ne’ebe sira hatama.
“Osan nebe maka husi SEPI fo atu sira bele halo bisnis ruma hodi bele kontribui ba nesesidade uma laran,” hateten Xefe Martins semana kotuk (16/02) iha Palacio do Governu, Dili.
Nia hatutan, la’os proposta hotu ne’ebe feto sira hatama hetan hotu ajudus maibe sira ne’ebe tama kriteria ka tuir avaliasaun SEPI prense duni criteria.
“Osan sira ne’e atu halo bisnis ho objective ida atu oinsa para hakbi’it feto sira iha ekonomikamente para sira bele jere rasik osan nebe maka sira iha,”nia afirma.
Martins tenik, programa ne’e bele fo benefisui ba maluk feto sira atu bele hases an husi dependensia ekomonika ba sira nia la’en.
Programa ne’e halo iha Distritu 13 nia laran, nune’e feto sira nebe mak hakarak hatama proposta mai tenki halo grupu ki’ik ida, kompostu husi ema na’in 2 to’o na’in 5 ou na’in 4 hodi bele simu osan husi SEPI, nia esplika.
Iha lidun seluk Deputada Jasinta A. Pereira, apoia programa ida ne’e nune’e feto maluk sira labele dependensia liu ba la’en, liu-liu ekonomikamente.
“Programa ne’e kapaas atu bele hasa’e tan kapasidade maluk feto sira no bele kontribui mos ba nesesidade uma laran. Iha parte seluk mos wainhira kuandu maluk feto balun nebe maka la eskola bele mos involve barak iha aktividade balun nebe maka bele hasae ninia kunhesementu, ou nia skill ruma,bele espresa sai matenek nebe maka nia iha hodi bele hetan osan pur exemplu suku, homan liu husi aktividade ne’e ita bele hetan fali osan, ne’e para labele depende demais ba mane,” Deputada ne’e dehan.
Tanba nia parte apela ba feto maluk sira, hasae kapasidade no koinhesementu iha areas oin-oin ne’e importante, atu nune’e bele kolabora ho mane ou la’en sira hodi kompletea nesesidade uma laran.
