Diretor Servisu Investigasaun Criminal (SIC), Superintendente Calistro Gonzaga hateten, nia parte prende ai kameli kilograma 200 husi komunidade Aituri laran tanba laiha karta lisensa ruma husi Diresaun Nasional Florestal nian.
Tuir Diretor Gonzaga, SIC konsidera ida ne’e illegal no presiza halo investigasaun.
“Ita halo ona elaborasaun ho Diresaun Florestal ninian para atu bele hola mos partisipasaun iha laran, klaru ke ai kameli nebe maka iha neba ne’e illegalmente tanba Diresaun Nasional Florestal fo deit lisensa ba kompania 3 mak atu bele rekolha restus de ai kameli nebe maka iha
13 distritu, husi aldeia to’o mai iha nasional, mais agora ai kameli Aituri laran ne’e illegal tanba ema nebe maka rekolha ne’e la nomeia husi diresaun florestal ninian,” hateten director SIC Superintendente Calistro Gonzaga, semana kotuk (13/02) iha Kaikoli,Dili.
Nia hatutan, kazu ne’e SIC entrega ona ba iha polisia distrital Dili no sei submete ba iha Miinisteriu Publiku hodi halo prosesu investigasaun ne’ebe klean.
“wainhira ita levanta ona ba iha Ministeriu Publiku depois ita hein delega kompetensia ita sei bolu nia, husu nia informasaun se kuandu posibilidade duni nesesariu ita rekunhese nia arguidu para depois aban bainrua maka nia aprezenta iha tribunal,” nia dehan.
“Aikameli agora iha ona florestal nia kontrolu tanba ita mos laiha armazen ida propiu para ita atu tau buat sira ne’e tanba ne’e maka hau konvida hela sira e sira mos partisipa iha elaborasaun servisu ne’e,” Gonzaga tenik.
Entertantu Presidente Komisaun D Parlamentar, Deputada Brigida Correia hateten tuir informasaun nia iha katak governu so fo deit lisensa ba kompania tolu hanesan Kompania Nova Bridi, Elipsi no Kompania Star Agro Industri, sira ne’e mak bele rekolla ai kameli iha teritoriu tomak.
“Hau hetan informasaun katak kompania tolu mak bele rekolha no exporta ai kameli, e komunidade ne’ebe tesi ai kameli arbiru ne’e tanba sira la hatene no la komprende,” nia katak.
Atual Dosente Fakuldade Agrikultura iha Universidade Nasional Timor Lorosa’e (UNTL) ne’e, husu ba governu liu-liu Ministeriu kompetente atu halo sosializasaun ba povu nune’e sir abele hatene no labele tesi ai kameli ho arbiru.
Iha sorin seluk Deputadu Paul Martins dehan, governu nomeia ema hodi ta’a aikameli nebe maka tuan ona, mais iha pratika bele iha iregularidades ne’e duni Ministeriu Agrikultura ninian Departementu sira iha Distritu tenki kontrola.
“Tenki kontrola, kuandu sira hatene mak la halo tuir lei nebe fo ba sira antaun tenki prende kedas,” Deputadu Martins katak.
