Programa Ligasaun Negósiu ne’ebé implementa husi Instituto de Apoiu ao Dezenvolvimento Empresarial (IADE) kontinua ajuda emprezáriu sira iha Timor-Leste atu hetan asesu ba merkadu, liuhusi ligasaun entre produtór, fa’an-na’in no sosa-na’in, hodi hasa’e vendas no rendimentu negósiu sira.
Diretór Nacional de Coordenação Operasional (DNCO) iha IADE, Juvenal Alves, hateten katak programa ne’e kria atu responde ba difikuldade emprezáriu sira ne’ebé iha produtu, maibé seidauk iha merkadu atu fa’an.
“Programa Ligasaun Negósiu ne’e atu liga negosiante sira ho merkadu. Karik sira produz hortikultura maibé laiha merkadu, sira bele mai IADE atu buka dalan no oportunidade atu suplay sira-nia produtu. IADE hanesan fasilitadór entre fa’an-na’in no sosa-na’in,” dehan Juvenal iha nia knaar-fatin, Mandarin, Díli.
Nia esplika katak IADE la determina kuantidade ka presu produtu sira, maibé fasilita komunikasaun no negosiasaun entre parte rua. Nia mós husu emprezáriu sira ne’ebé hasoru difikuldade iha área empresariál atu hakbesik an ba edifísiu IADE ne’ebé iha maioria munisípiu sira.
Iha parte seluk, akademista husi Universidade Díli, Marcolina Viegas, hateten katak programa ne’e hanesan inisiativa importante ida husi governu atu apoia emprezáriu ki’ik sira.
Tuir nia, programa ne’e ajuda emprezáriu sira atu hetan oportunidade merkadu, halo rede negósiu no hametin relasaun entre produtór, fornesedór no konsumidór sira.
“Programa ida-ne’e bele kontribui ba kresimentu ekonomia lokál, tanba fasilita troka informasaun, promove produtu lokál no loke dalan ba emprezáriu sira atu aumenta vendas no rendimentu,” hatete Marcolina iha Kampus UNDIL, Díli.
Nia akresenta katak programa ne’e mós bele motiva juventude sira atu envolve an iha empreendedorizmu no kria oportunidade servisu ba komunidade sira.
Relasiona ho dezenvolvimentu programa iha futuru, Marcolina fó sujestaun atu governu habelar programa ne’e ba munisípiu hotu, partikularmente área rurál sira, atu emprezáriu barak bele hetan benefísiu.
Nia mós rekomenda atu IADE halo monitorizasaun no avaliasaun regulár ba impaktu programa nian no kontinua fó apoiu ba emprezáriu sira depois de partisipa iha atividade sira, atu sira bele implementa koñesimentu no kontatu ne’ebé hetan.
