Ministériu Edukasaun (ME) presiza reabilita sala-de-aula hamutuk 1,550 kompostu husi pre-eskolar, ensinu báziku, no ensinu sekundáriu iha territórriu laran.
Ministra ba ME Dulce de Jesus Soares dehan, dadaun ne’e ME, Ministériu Administrasaun Estatal, Ministériu Finansas, no Ministériu Obras Públiku no Banku Mundial implementa programa infraestrutura ho kualidade iha Timor-Leste. Tanba ne’e sira identifika ona eskola balun ne’ebé presiza halo reabilitasaun ba sala-de-aula.
“Prosesu husi identifikasaun ne’e mak identifika sala de aula hamutuk 1,550 mak presiza ita halo reabilitasaun,” nia hatete.
Nia hatete, sala-de-aula 1,550 ne’ebé identifika ne’e kompostu husi pre-eskolar 200, ensinu báziku 1050 no sekundáriu 300 iha territóriu laran tomak.
“Númeru ida-ne’e sei kontinua aumenta, tanba durante ne’e ita laiha sistema manutensaun infraestrutura, maibé ho instalasaun programa infraestrutura kualidade ne’e ita sei instala ho kualidade nune’e projete infraestrutura eskolar ho di’ak,” Ministra ME Soares hatete.
Nia hatete, programa ne’e nia objetivu la’ós de’it atu reabilita sala-de-aula de’it, maibé bele fornese infraestrutura sira ho efisiente liu, ho transparénsia liu, ho sustentável liu, kualidade ne’ebé aas ho lalais liu.
“Bainhira ita ko’alia kona-ba eskola, ita ko’alia kona-ba labarik sira, ita ko’alia kona-ba aprendizajen, ita ko’alia kona-ba oportunidade, ita ko’alia kona-ba esperansa. Ita mós ko’alia kona-ba fundasaun sira ne’ebé sei harii prosperidade, estabilidade, no dezenvolvimentu Timor-Leste nian iha futuru”, nia salienta.
Iha parte seluk Koordenadór Rede Edukasaun Timor-Leste Coalition for Education (TLCE) Jose Monteiro hatete, eskola balun labarik barak maka kontinua aprende iha sala-de-aula sira iha edifísiu eskola ne’ebé aat daudaun no sei falta fasilidade edukasionál adekuadu sira.
“Ita haree iha durante tempu udan, sala-de-aula balu sai difisil ka imposivel atu uza, tanba kondisaun ne’ebé grave tebes, tanba ne’e presiza halo reabilitasaun no aumenta sala-de-aula,” nia salienta.
Nia hatete, kondisaun infraestrutura maka durante ne’e sai barreira ba aprendizajen no barreira ba dezenvolvimentu kapitál umanu ne’ebé Timor-Leste.
“Governu liuhusi Ministériu Edukasaun tenke tau prioridade hodi bele hadia no konstrui infraestrutura ne’ebé mak kualidade,” Koordenadór TLCE Monteiro informa.Nia dehan, eskola sira tantu iha área urbana no rural tenke iha moru protesaun nune’e bele garante katak infraestrutura eskola sira protejidu husi animál.
