Polísia Nasionál Timor-Leste (PNTL) deklara katak sei la fó espasu ba movimentu krime organizadu iha Timor-Leste, tanba bele lori risku ba komunidade.
Diretór Diresaun Servisu Investigasaun Kriminál (DSIK) iha PNTL, Superintendente Xefe João Belo dos Reis, hatete katak dadaun ne’e krime organizadu ho tipu jogu online komesa tama ona iha Timor-Leste no polísia halo ona identifikasaun hodi hapara atividade ilegál hirak ne’e.
“Polísia sei la fó espasu ba atividade krime organizadu nia sirkulasaun iha Timor-Leste,” nia informa.
Relasiona ho situasaun ne’e, nia dehan katak dadaun ne’e polísia realiza operasaun hodi buka tuir fatin no ema hirak ne’ebé realiza atividade jogu online hodi submete ba prosesu, tanba atividade ne’e ilegál no lori risku ba komunidade.
“Ita identifika ona atividade krime organizadu iha fatin haat (4) iha kapitál Díli, hanesan área Tibar, Manleuana, Bebonuk no Metiaut. Atividade ne’ebé iha mak hanesan jogu online,” Diretór DSIK, Superintendente Xefe Reis, informa.
Nia hatete katak husi fatin hirak ne’ebé sira identifika no halo aprensaun, polísia asegura sidadaun hamutuk 93 no ekipamentu eletróniku ne’ebé autór hirak ne’e utiliza hodi realiza jogu online.
“Sidadaun hirak ne’e kompostu husi nasaun Indonézia no Xina,” nia dehan.
Nia dehan katak sidadaun hirak ne’e polísia asegura ona hodi kontinua prosesu ba tribunál tanba atividade ne’ebé sira realiza ilegál.
Iha parte seluk, Diretór Ezekutivu Fundasaun Mahein (FM), Nelson Belo, hatete katak polísia tenke esforsu maka’as hodi buka tuir sidadaun estranjeiru sira ne’ebé tama iha Timor-Leste no sira-nia atividade, nune’e situasaun hirak ne’e labele akontese tan.
“Komunidade sira labele monu ba lasu, tanba ita hatene katak ita-nia komunidade sira susar tebes atu hetan rendimentu hodi sustenta moris loroloron,” nia salienta.
Nia hatete katak polísia tenke fahe informasaun kona-ba lala’ok jogu online nian nune’e komunidade sira bele hatene no labele monu ba lasu.
