Komandu Polísia Nasionál Timor-Leste (PNTL) konsidera komunidade sira sei falta informasaun kona-ba atividade krime online, tanba ne’e komunidade kontinua sai vítima ba kazu online sira.
Diretór Servisu Investigasaun Kriminál PNTL, Superintendente Xefe João Belo dos Reis, hateten katak dadaun ne’e komunidade barak mak sai vítima ba krime online, hanesan sosa kareta, motorizada no sasan eletróniku, nune’e mós investimentu online. Nia haktuir katak vitima sira depois transfere osan, sasan ka rezultadu ne’ebé promete la iha.
“Komunidade sira kontinua sai vítima, tanba komunidade falta informasaun kona-ba lala’ok krime online,” nia dehan.
Nia hatete katak krime online ne’e hala’o hanesan rede organizadu, no sira halo publikasaun oioin iha média sosiál hodi bosok ema kona-ba fa’an sasan ka investimentu, hodi hetan lukru ba sira-nia benefísiu rasik.
“Durante ne’e husi parte PNTL ita sempre halo publikasaun kona-ba krime online, maibé komunidade sira ladún tau importánsia ba informasaun hirak ne’e. Ikus mai sai ona vítima mak mai keixa,” Superintendente Xefe Reis hatete.
Nia hatete katak kada tinan kazu krime online sempre akontese no PNTL kontinua halo sosializasaun iha dalan públiku no liuhusi média, maibé komunidade ladún tau interese no kontinua sai vítima.
“Ita husu ba komunidade sira atu tau importánsia ba avizu sira ne’ebé fó-sai ona no hadook an husi krime online sira, tanba osan ne’ebé imi fó sai la fasil atu hetan fila fali,” nia hateten.
Nia dehan katak foin lalais ne’e PNTL halo aprensaun no kaptura sidadaun Indonézia hamutuk na’in 63 ne’ebé realiza atividade krime online iha hotel ida iha Tibar. Nia husu komunidade sira atu labele monu ba lasu iha média sosiál.
Iha parte seluk, Anastasia da Costa, vítima krime online, hateten katak nia triste tebes tanba lakon osan hamutuk USD 5.000 bainhira tenta sosa kareta ho marka Avanza liuhusi aplikasaun online.
Nia informa katak depois transfere osan ba númeru ne’ebé fó ba nia, númeru refere la ativu ona bainhira nia tenta konfirma.
“Osan USD 5.000 ne’e ha’u transfere dala rua. Primeiru transfere USD 2.500 dehan atu trata dokumentu sira, ikus transfere tan USD 2.500 hodi haruka kareta mai Díli, maibé hein hahú husi fulan Abril to’o fulan Juñu mós rezultadu laiha. Ha’u triste tebes,” nia hatete.
Nia dehan katak osan hirak ne’e nia hetan liuhusi esforsu ne’ebé durante ne’e halo loroloron, maibé lakon de’it iha oras balun nia laran.
“Ha’u husu ba parte polísia atu buka tuir autór sira, atu nune’e bele devolve fila fali osan ne’ebé ami fó ona ba sira,” Costa hatete.
Aleinde ne’e, nia husu ba maluk Timoroan sira hotu atu labele fasilmente fiar publikasaun kona-ba fa’an no sosa sasan iha média sosiál, nune’e labele sai vítima.
