Diretora Unidade Pesoal ba ema Vulneravel (VPU) Daria Ximenes hateten total kazu Violensia Domestika (VD) ne’ebe tama iha VPU durante 2011 husi 13 Distritus hamutuk 589 kazus.
“Kazu VD hamutuk 589 mai husi Distritu 13, hahu husi 01 de Janeiru to’o 31 Dezembru 2011, enkuantu ba 2012 nian seidauk iha relatorio husi Distritu mai iha Nasional,” hateten Diretora Ximenes, semana kotuk (15/05) iha Kaikoli Dili.
Diretora Ximenes haktuir, hare ba kondisaun vitima ne’e wainhira kuandu vitima sente la seguru, mak VPU sei refere ba iha Uma Mahon sira atu halo atendementu nebe maka signifikante liu.
Iha lidun seluk Jasinta A. Pereira, membru Grupu Feto Parlamentar Timor-Leste (GMPTL), hateten kazu VD kontinua sa’e maka’as tanba sosializasaun Lei VD nian seidauk to’o iha area rurais no komunidade seidauk iha konsensia atu proteze malu.
“Menus informasaun husi autoridade sira nebe maka relevante, liu-liu husi lider komunitariu, husi Polisia, SEPI rasik atu habelar informasaun ba ita nia komonidade atu sira mos iha konsensia rasik buat ida violensia ne’e krimi, wainhira komunidade sira liu-liu hela iha area rurais sira ladun hetan informasaun antaun VD sei nafatin mosu,” dehan Pereira.
Tanba ne’e husu institusaun ne’ebe kompetente liu-liu Sekretaria Estadu ba Promosaun Igualidade (SEPI) hodi habelar informasaun ba iha baze atu nune’e bele redus numeru VD iha rai laran.
