Lei Rejime Tranzitoriu aprova ona iha Parlamentu Nasional (PN) foin lalais no hein para hodi halo reforma ba Funsiunariu Publiku (FP) ne’ebe idade liu ona maibe sei servisu nafatin. Deputadu Francisco Branco hateten lei rejime tranjitoriu sei fo benefisiu ba Funsionariu Publiku sira tanba oras ne’e dadauk funsionariu sira balun idade liu tiha ona 60 resin maibe sei servisu nafatin.
“Funsionariu tinan 60, servisu minimu tinan lima bele hetan ona reforma,” dehan Deputadu Branco semana kotuk (14/02) iha PN, Dili.
“Rejime ida ne’e tranzitoriu atu responde ba situasaun ida ne’e no mos funsionariu sira nebe mate ona, sira nebe hetan dezastre invalido,sira mos hetan benefisiu husi lei ida ne’e”
Deputado Branco dehan, iha lei rejime tranjitoriu ne’e hatete, orsamentu ba reforma funsionariu publiku sira ne’e 75 pursentu husi salariu mediu.
Lei rejime tranjioriu ne’e implementa to’o deit iha 2015.
Entertantu Deputadu Bankada CNRT, Aderito Hugo, hateten proposta lei rejime tranjitoriu ne’e Governu prepara durante tinan rua nia laran hafoin Parlamentu aprova foin lalais.
“Lei rejime especial ba siguransa social ne’e trata ema sira nebe sai servidor Estadu, sai funsionariu publiku, Forsa Defeja no mos PNTL nebe que taman idade 60 anos, sira iha direitu atu rekere reforma ninian,” hateten Deputado Hugo.
Nia dehan, proposta lei ne’e husi ministeriu Solidariedade SoSial mak sai autor ba lei ne’e nebe halo konsulta kapas tebes estudu komparativu ho nasaun Australia, America, Asea, no nasaun iha Eropa no Africa sira nian.
“Parlamentu aprova tiha ona iha semana liuba hein deit prejidenti da republika atu promulga,” Deputadu Hugo informa.
Iha lei ne’e sei kobre direitu ba funsionariu sira nebe mak servisu iha 2002 to’o agora maibe mate tiha ona maibe servisu durante tinan lima nia laran, sira nia Fen, no oan iha direitu atu hetan nia direitu.
“Depois sira mate bele substitui sira nia fen,sira nia laen no sira nia oan nebe ke sei moris,” Deputado Hugo informa.
