Atu hasa’e kapasidade membru Polisia Nasional Timor-Leste (PNTL) tantu iha nivel nasional no Distrital, Instituisaun PNTL servisu hamutuk ho Polisia Federal Australia fo formasaun kona ba jestaun ezekutiva ba ofisiais superior sira durante semana ida iha ETDA, Dili.
“ita na’in 20 husi ofisiais superior nebe maka pertisipa iha kursu ne’e e kursu ne’e importante tebes tanba atu hasae ami nia kapasidade lideransa ninian atu dezemvolve servisu PNTL ninian, kursu ne’e iha
durasaun tinan ida maibe ita halo estafeta teoria-pratika depois ikus mai sei finaliza iha Australia atu remata to’o tinan ida, ami sei gradusaun iha tinan oin iha 27 iha Marsu 2013,” dehan Diretor Servisu Investigasaun Criminal (SIC) Superintendente Calistro Gonzaga, semana kotuk (15/02) iha Kaikoli Dili.
Diretor Gonzaga hatutan, objective husi kursu ida ne’e atu hatene liu kona ba lideransa ninian, kona ba sistema, kona ba termus de lei sira ne’e. kurzu ne’e ho naran Jestaun Ezekutiva polisia nian ne’e propio.
Entretantu Diretor Nasional Departementu Logistik PNTL, Superintendente Basilio de Jesus dehan kursu jestaun ezekutiva ne’e hanesan segundu turnu.
“ Kursu ida ne’e ho objectivu atu fo formasaun ba ofisiais superior sira kona ba jestaun lideransa, iha kursu nia laran sira hanorin ami ho modul oin-oin fo mai ami,” dehan Diretor Basilio.
Nia sublinha liu tan, kursu ne’e importante tanba koalia klean liu kona ba tipu de lideransa tuir karacter nebe maka PNTL iha nomos delegasaun de kompotensia e delegasaun de servisu Polisia nian ba iha subordinario sira.
