Administrador Distritu Liquisa ejiji ba governu atu hadia lalais estrada ne’ebe oras ne’e aat hela nune’e populasaun sira bele ba tuir elisaun prezidensial nian iha estrada ne’ebe diak no kaber.
“Hau hanoin estrada ne’e importante tebes liu-liu elisaun Prezidensial ne’ebe sei hala’o iha fulan oin tanba husu ba governu atu tau atensaun lalais ba kondisaun Estrada iha area rurais liu-liu Estrada ba sentru votasaun nian nune’e povu bele tuir elisaun ho diak,” husu Administrador Liquisa Domingos da Conceicao dos Santos, foin lalais (08/02) bainhira partisipa iha enkontru Sekretariadu Tekniku Administrasaun Eleitoral (STAE) ho Administrador Distritus sira iha salaun STAE, Kaikoli Dili.
Administrador ne’e dehan, povu nia presiza mak ahi, estrada no bee moos tanba ne’e atu garanti elisaun la’o diak no susesu, governu tenke tau atensaun lalais ba kestaun ne’e.
Iha fatin hanesan Administrador Distritu Lautem, Jeferino dos Santos Sequeira hateten nia parte garante katak elisaun ba tinan ne’e sei la’o ho susesu maske ho kondisaun Estrada ne’ebe ke la favorese ba sira atu asesu ba iha sentru votasaun.
“Ba ami elisaun jeral iha tinan 2007 la’o ho susesu maske ho problema ne’ebe oioin maibe tinan ida ne’e sei diak oituan ne’eduni ami nudar administrador distritu garantia katak elisaun jeral sei la’o ho diak maske infrenta kestaun estradas ne’ebe la adekuada,” dehan Administrador Sequeira.
Nia hatutan, alende estrada problema seluk ne’ebe Distritu ne’e infrenta mak kona ba numeru dezempregu ne’ebe aumenta tanba menus de kampu servisu.
Tuir nia, atu redus numeru dezempregu iha Distritu ne’e mak liu husi programa Projetu Empregu Rural ne’ebe implementa husi Sekretariu Estadu Formasaun Profesional i Empregu (SEFOPE) tanba fo benefisiu ba komunidade sira.
“Komunidade presiza tebes projetu ne’e no presiza mos estrada nune’e movimentu transporte publiku ho diak no bele lori produtu local ba iha merkaduria,” nia katak.
Preokupasaun hanesan mai husi Administrador Distritu Manatuto, Gaspar da Silva katak estrada iha area rurais barak mak aat inklui mos numeru dezempregu aumenta iha Distritu ne’e.
“Buat hot-hotu konsentra deit iha capital Dili entaun difisil ba komunidade sira iiha Distritu lliu-liu iha area rurais atu asesu ba estrada ne’ebe diak no difisil atu asesu ba informasaun,” Administrador ne’e dehan.
Administrador espera katak ho imlementasaun programa Projeitu Empregu Rural husi SEFOPE iha Marsu tinan ne’e bele redus numeru dezempregu iha area rurais sira.
