Konstruksaun haris fatin publiko ka latrina iha areadores kampu aviasaun Palaban iha Sucu Costa, Sub-Distritu Pante Macasar, Distritu Oe-cusse, ne’ebe hari liu husi program pakote referendum iha tinan 2009 hosi kompania Nunu Timo ho montante US$8,000 to’o agora la funsiona tamba la iha be’e mos.
“Situasaun ne’e fo impaktu boot ba passajeirus ba-mai Dili Oé-cusse waihira atu liur boot ka kik tenke helik a’an deit iha ai laran,” dehan Xefi Sucu Costa Alexo Abi semana kotuk (15/02).
Xefi Abi husu ba parte kompetente atu toma medidas ho urjente ba situsaun ne’e tamba faslidade ne’e importante ba komunidade no passajeirus iha kampo avisaun iha Palaban.
Iha parte seluk Ofisial Dezenvolvementu Distritu Oé-Cusse (DDO) Miguel Busan hateten nia parte hato tiha ona ba parte SAS Distritu Oé-Cusse hodi buka solusaun.
“Hau propoin ona ba SAS atu dada be’e mos ba haris fatin sira iha area portu neba, atu passajeirus no bainaka sira mai visita Oé-Cusse waihira atu soe be’e la buka fatin. E uma sira ne’e kapas tebes soke be’e maka la iha jadi hau sei propon nafatin ba SAS atu resolve,” Ofisial Busan hateten.
Hatan ba kestaun ne’e Kordenador Servisu Agua e Sanimentu (SAS) Distritu Oé-Cusse Josê Teme Suni hateten latrina refere seidauk fugsiona tamba menus fungsionario SAS no sei presiza unifikasaun sistema distribuisaun be’e entre Sistema hosi Tempu Portugues,Okupasaun Indonesia, no tempo agora tamba be’e lakon barak.
“Latrina Palaban ne’e seidauk utuliza ne’e tamba ami menus fungsionario alende ne’e sistema ne’e kanalizasaun be’e mos ita uza hela sasan portuguesa, Indonesia to hamrik mesak ne’ebe kanuk sira enferujadu no kuak hodi be’e la bele aksesu to ne’eba,” hateten Funsinoario SAS Suni.
Nia garantia katak problema ne’e sei resolve iha tempo badak tamba SAS no Banku Dezenvolvimentu Asiatiko (ADB) halo ona estudu hodi tau matan ba problema be’e mos iha capital Oé-Cusse.
Entretantu tuir Regina Ola nudar Diretora Kompania Nunu Timo hateten katak prosesu kanalizasaun be’e mos ba haris fatin ne’e laos kompanhia nia knar maibe sira so dada deit kanu ba latrinas ne’ebe sira harii ona.
“Problema be’e tama ka la tama ne’e laos ami nia kompetensia, ami so instala kanu husi dadalan ninin to iha uma haris fatin ne’e,” Diretora Ola hateten.
