Deputada Brigida Coreia hateten komunidade iha Sub-distritu Turiskai, Distritu Manufahi fulan walu ona la hetan asesu ba iha eletrisidade tanba mina laiha.
“Hau simu informasaun direitamente husi komunidade ne’ebe hetan hau iha dalan iha Sexta-feira ne’e, sira lamenta ho sira nia kondisaun, liu-liu eletrisidade ne’ebe la lakan durante fulan walu ona,” hateten Deputada Coreia, semana kotuk (14/02) iha Parlamentu Nasional (PN), Dili.
Tuir nia, Diresaun Nasional Eletrisidade Distritu Manufahi nian hato’o ona ba iha komunidade sira iha fatin ne’eba katak sira labele lori mina ba iha ne’eba tanba estrada aat.
“Maibe hau hetan informasaun husi maluk deputadu sira husi Turiscai nian hateten katak, estrada ema loke ona, povu rasik mak loke maibe Governu sidauk tau matan atu haruka mina ba iha neba atu povu sira neba asesu ba eletrisidade,” nia preokupa.
Iha fatin hanesan Deputado Francisco Jeronimo hateten , maske politik nain sira promote ona katak ahi sei lakan normal durante 24 oras, maibe realidade fatin balun ahi kontinua mate.
“Hau hakarak hateten deit katak, iha Liquisa ahi kalan dala ruma lakan dala ruma mate,maibe iha Maubara durante ne’e ahi la moris tiha ona,” nia kritika.
Jeronimo dehan,maske Airin tohar sira ne’e hadia fila fali ona maibe to’o agora ahi la lakan nafatin.
“Ita bo’ot sira haruka to’o k ida ba Maubara ahi moris ga l’ae,” nia dehan.
Alende Distritu Manufahi, Sub-distritu Turiskai, iha distritu Ermera, Sub-distritu Atsabe ahi la lakan durante fulan hat ona.
“Ida ne’e ba dala rua hau foti iha ne’e tanba komunidade lamenta tebes, besik ona iha eleisaun sira la hetan informasaun husi Radio Televizaun Timor –Leste (RTTL),” dehan Deputada Jacinta Perreira.
Nia hatutan, momentu halo debate urjensia iha Parlamentu Nasional, Sekretariu Estadu Eletrisidade dehan eltrisidade iha Atsabe mate tanba mina la iha.
“Sira haruka duni mina ba Sub-distritu Atsabe maibe lakan deit kalan tolu,depois mate fali to’o agora la lakan fila fali,” Deputada Pereira dehan.
Entretantu bainhira TDW koko konfirma asuntu ne’e ba iha SEAU,Januario Pereira maibe lakonsege tanbala iha fatin.
