Maske seidauk hetan akreditasaun husi governu Universidade Dili (UNDIL) kontinua simu estudante foun maibe tuir Vise Presidente Komisaun F Parlamentar, Deputadu Francisco Jeronimo katak atu loke ou taka universidade ida ne’e kompetensia governu nian.
“Atu loke escola ida ne’e kompetensia governo nian atu taka mos kompetensia governo nian tanba ema ida atu loke escola ida hatama proposta ba governo mak deside se Governo simu escola ne’e loke se governo la simu escola ne’e la loke,” hateten Vise Prezidente Komisaun Fne’ebe toma asuntu kona ba Educasaun, Saude, no Cultura Francisco Jeronimo, semana kotuk (14/02) iha Uma Fukun Parlamentu Nasional Dili.
Deputadu ne’e hatutan, escola la’o tiha ona e governu nia knar mak tenki akompania universidade rua ne’ebe seidauk hetan akreditasaun, oinsa para bele hetan akreditasaun.
“Labele tur tur deit, Ministerio Educasaun tenki ba supervision, akompania, tau matan para bele lori sira to’o hetan akreditasaun,” nia dehan.
Entretantu Xefe Departamentu Licenciatura no Akreditasaun do Ensino Superior Ministeriu Educasaun (ME) Vasco Viana hateten Universdiade hotu ne’ebe eziste iha Timor-Leste (TL) tenki submete ba iha governu nune’e bele hetan akreditasaun.
“Konsekuensia mak bainhira sira ne’e gradua sira nia diploma ne’e la hetan legalizasaun, konesementu no politika ministerio Educasaun mak halo ezame (Ujian Negara),” Xefe Viana dehan.
Kona ba universidade ne’ebe seidauk hetan akreditasaun maibe kontinua simu estudante, tuir Xefe Viana universidade ida-ida iha autonomia rasik hanesan mos UNDIL.
Tan ne’e estadu labele mete, sira loke escola estadu la taka matan, loke universidade maibe tenki submete ba prosesu legal ruma husi Governo.
Entretantu total estudante ne’ebe tama iha UNDIL no remata ona sira nia masa orientasaun ba tinan ida ne’e hamutuk 800 pesoas.
“Hau hakarak tama iha Universidade Dili tamba primeira vez universidade ne’e loke fakuldade foun ho nia departamentu saude oral dentist ne’ebe hau hakarak tebes atu tama iha universidade ida ne’e,” dehan estudante foun Tunuzia Carola da Costa Freitas.
Nia esperansa katak iha tinan ida ne’e UNDIL bele ona hetan akreditasauun husi Governu tanba agora iha hela prosesu nia laran.
“Universidade ida ne’e mos bele la’o ba oin bele foti Timor-Leste ba oin hanesan universidade sira seluk,” nia esperansa.
Nia parte foti fakuldade ida ne’e tanba hakarak servi povu ida ne’e,liu-liu ba sira ne’ebe ho moras nehan. “Hau hakarak servi povu, la’os tanba hau nia valor la to’o atu tama Universidade Nasional Timor Lorosa’e mak main iha ne’e, la’e ne’e hau na hakarak duni,”nia katak.
Iha fatin hanesan estudante Nicodemos Lopes hateten nia parte garante katak tinan ne’e UNDIL sei hetan akreditasaun husi governu.
“Hau kontente atu mai escola iha Universdiade ida ne’e tamba hau valor ne’ebe iha lato’o tuir criteria ne’ebe iha Universidade Nasional Timor Leste ida ne’e hakarak tan ne’e mak hau mai escola Universidade Dili ida ne’e ,”hateten Lopes.
Tuir Estudante lopes hateten katak Escola hotu hotu hanesan deit ne’ebe ema hotu hotu hakarak buka matenek iha Universidade sira ne’ebe mak iha Timor laran , Liu liu iha Universidade Dili tamba sira nia programa mos diak kona ba fakuldade ne’e nia gosta.
“Hau husu ba Governo atu bele tau matan mos baa mi estudante, liu-liu ba ami nia Universidade Dili ida ne’e,” nia husu.
