Bongkar pasang, karik istila ida ne’e mak serve duni ba iha atividade prostituisaun iha Aitarak laran, vizinhu kedas ho Palasiu Prezidente da Republika nia sorin ne’ebe uluk Polisia halo ona atuasaun hodi sobu tiha fatin ne’e maibe agora eziste fali ona no membru Parlamentu Nasional sira lamenta tanba fo imajen ladiak ba palasiu prezidente nian.
Deputadu Natalino dos Santos husu ba Polisia Nasional Timor-Leste (PNTL) atu halo atuasaun lalais ba fatin ne’e tanba alende fo imajen ladiak ba palasiu prezidente nian, mos bele fo moras aat ba ema seluk.
“Husu ba autoridade lokal, liu-liu Xefi suku no Xefi Aldeia kolabora ho polisia hodi fo informasaun ba sira nune’e Polisia bele halo tindakan tegas ba atividade ne’e,” husu Deputadu dos Santos foin lalais (09/02) iha Uma Fukun Dili.
Tuir nia, ida ne’e fo imajen ladiak ba palasiu prezidente tanba palasiu prezidente nudar simbolu du estadu e mos ba povu nasaun ida ne’e.
Atividade prostituisaun iha fatin ne’e uluk (tinan kotuk) polisia servisu hamutuk ho staf sira Ministeriu Turismu Komersiu e Industria (MTCI) hodi sobu no duni sai ema sira ne’e maibe agora eziste fali.
Entretantu tuir Deputadu Vidal de Jesus alias Riak Leman katak atividade prostituisaun ladiak tanba bele lori moras aat ba ema seluk e presiza halo atuasaun lalais ba fatin ida ne’e.
“Buat ida prostituisaun ne’e lori moras barak, liu-liu moras ida naran HIV/SIDA,” nia dehan.
Alende ne’e tuir nia, hahalok prostituisaun la refleta ba ema Timor ne’ebe maioria Katolika “relijiaun Katolika lahanorin ita hanesan ne’e,” nia katak. “Ita nia bei ala sira la’os eduka ita atu sai dalan ida hanesan ne’e.”
Tanba ne’e, Deputadu ne’e husu polisia sira atu atuasaun ba iha fatin prostituisaun ne’ebe iha rai laran liu-liu iha capital Dili.
Enkuantu tuir kliente ne’ebe lakohi fo sai nia identidade ba publiku ne’ebe bai-bain mai iha fatin ne’e hateten fatin ne’e loke durante 24 oras nia laran.
“Iha ne’e hanesan fatin halimar ba joven no katuas sira,” katak fontes konfirmadu ne’e.
Tuir fontes ne’e, feto sira ne’ebe iha fatin ne’e maioria feto Timor no feto estranjeiru balun.
“Ita tama dala ida selu US$15, $5 selu ba kuartu, $10 dolar uma nain nian,” fontes ne’e dehan.
Entretantu bainhira TDW koko konfirma asuntu ne’e ba iha Polisia Distritu Dili nian maibe membru polisia ne’ebe lakohi fo sai nia identidade ne’e hateten atu halo atuasaun ba atividade illegal ruma tenke hetan autorizasaun husi komandante Jeral PNTL.
“Depois Komando Distritu Dili fo orientasaun ba membru sira hodi tun ba terenu hodi atuasaun,” hateten fonte ne’e.
