Xefe Gabinete Sekretariu Estadu Joventude e Desportu (SEJD) Nino Perreira hateten atu harii eskola futebol iha Timor-Leste, oras ne’e dadaun nia parte identifika hela fatin atu hari sentru treinamentu futebol nian.
Tuir Xefe Perreira, governu TL liu husi SEJD ho Fundasaun Real Madrid asina memorandu iha 24 Setembru 2011 atu loke eskola futebol nian ida iha TL nune’e joventude ne’ebe iha talent desportu bele apresia sira nia talent ne’ebe iha.
“Ita presiza hare mak fasilidade treinamentu hanesan kampu koalia konaba kampu mak hanesan ita nia Kampu Demokrasia, Stadio Municipal Dili, ne’ebe sei tama iha Federation Internasional Football Asosiation (FIFA) no Kampu ida iha Becora, entau fatin sira ne’e mak ita sei identifika atu sai hanesan fatin hala’o treinamentu,” dehan Xefe Pereira, semana kotuk (14/02) iha knar fatin Bidau Lecidere, Dili.
Nia hatutan planu ne’e sei implementa iha Distritu hat mak Distritu Dili, Baucau, Ermera no Bobonaro mak sei sai hanesan sentru ba eskola tebe bola nian maibe sei hahu uluk iha Distritu Dili.
“Hahu uluk ho Sentru Treinamentu deit seidauk hanoin kona ba uma asrama tanba durante ne’e Sentru Treinamentu Juvenil (ekipa Mr. Kim) hala’o ona treinamentu no Fundasaun Real Madrid sai treinador ba tekniku mai atu kompleta deit no sira sei halo selesaun ba jogadores sira ne’ebe iha kapasidade atu bele partisipa iha futebol internasional hodi promove sira nia talentu ne’ebe iha,” nia katak.
Iha lidun seluk Presidente Komisaun H Parlamentar ne’ebe trata asuntu Joventude Desportu e Formasaun e Profesional, Antonio Cardoso hateten hare ba ho tempu ne’ebe iha katak la permiti ona atu implementa planu ne’e,liu-liu eleisaun jeral ne’ebe besik dadaun, nia parte duvida katak governu foun ne’ebe mai sei implementa ka la’e planu ne’e.
“Ita hare governu ida ne’e se nia mandatu naruk ita bele dehan katak sei realize ou la realiza maibe agora dadaun ema hotu prepara aan atu supporta ema ne’ebe sira fiar no prepara mos programa no planu atu tama iha kampania entau tempu ne’e ladun premite atu realize planu ne’e maibe ne’e la signifika katak para maibe ita mos tenke hare governu ida mai ne’e iha duni interese ba planu ne’e ka lae atu halo kontinuasaun tanba realidade governu foun iha planu foun entau depende ba governu foun ne’ebe sei uku ita espera katak governu foun bele halo kontinuasaun ba planu sira ne’e tanba importante tebes,” duvida Deputadu Cardoso.
