Atu promove kreatividade feto Timor-Leste liu-liu feto sira iha area rurais hodi kontribui no partisipa iha dezenvolvimentu nasional, Organizasaun Non Governmental (NGO) Hamahon Feto Timor (HAFOTI) loke sira nia loja ida nune’e bele tau produtu local ne’ebe feto rural sira produs atu komunidade bele sosa.
“Hare ba realidade ne’ebe iha katak organizasaun barak mak mantein iha Kapital Dili no kaer husi ema sira ne’ebe hela iha capital, ita koalia kona ba setor agrikultura no dezenvolvimentu umanu sei laiha bailansu bainhira dezenvolvimentu iha deit kapital maibe importante liu ba iha area rurais. Entau HAFOTI hamrik ho objetivu atu kapasita no
dezenvolve feto sira iha area rurais no rezultado ne’ebe iha katak sira mos bele kontribui ba dezenvolvimentu nasaun nian,” dehan Presidente Board Rede Feto, Ivete de Oliveira, semana kotuk (04/02) bainhira partisipa iha serimonia lansamentu loja HAFOTI, iha Vila Verde, Dili.
Prezidente RF de Oliveira apresia no fo agradese ba NGO HAFOTI nia inisiativa no sira nia servisu maka’as hodi loke loja ne’e atu promove produtu local husi feto rural iha rai laran.
Iha fatin hanesan Presidente Board HAFOTI, Domingas Mirta Ramos Nunes da Cruz hateten HAFOTI sei loke tan sira nia liras iha distritu ne’ebe seidauk asesu ba atividade HAFOTI nian.
“Atu implementa tan ami nia programa ne’e ba distritus sira ne’ebe seidauk asesu maibe depende ba doadores ne’ebe suporta orsamentu mai ami. Se osamentu iha ami sei tama iha distritu seluk. Maibe se organizasaun seluk keta loke iha distritu sira seluk ne’ebe HAFOTI seidauk ba, ne’e ami pronto atu kolabora hamutuk hodi bele promove no fo treinamentu ba sira hodi bele kapasita sira oinsa atu hetan benifisiu husi produtu local,” Prezident Board HAFOTI da Cruz dehan.
Tuir nia oras ne’e dadaun HAFOTI asesu ona sira nia atividade iha Distritu hitu: Distritu Aileu, Bobonaro, Baucau, Liquisa, Manufahi, Oe-cusse no Viqueque.
Presiente HAFOTI Nunes hatutan katak alende fo treinamentu, halo mos distribuisaun produtu sira ne’ebe hetan husi feto rural hanesan mina nuu, kripik hudi, kripik ai farina, masin, tais, pasta, sabaun Timor nian, boneka, keramika, kafe Timor no seluk tan ba iha Supermerkadu Leader, Landmark Plaza, Supermerkadu Kmanek, Jacinto no Tiger Fuel inklui iha loza HAFOTI rasik.
Nia hatutan liu katak produtu ne’ebe faan iha loja Hafoti ne’e ho nia presu 50 sentimus ba leten no nia pursentu sei fahe tanba produtu sira ne’e mai husi grupo feto sira iha area rurais no sei rai iha kas HAFOTI hodi bele implementa fali aktividade iha futuru.
Prezidente Board HAFOTI da Cruz apela ba Ministeriu kompetente atu ajuda no reforsa atividade grupu feto sira iha distritus liu husi NGO sira, nune’e bele dezenvolve diak liu tan produtu local husi feto sira ne’e.
