Atu hakbi’it ekonomia uma laran e mos atu ajuda rendimentu mane nian, feto bele kria kreatividade ruma hanesan Grupu Feto Hadadin (GFH) ne’ebe kria produtu foun liu husi lixu plastiku ne’ebe ema soe.
“Fou-foun hau halibur hau nia feto maluk sira iha tempu rezistensia to’o agora atu promove produtu local hanesan suru tais no suku pasta ho tais. Entau iha tempu ne’eba hau hare komu tais barak liu ona entau hau iha hanoin atu halo fali produtu seluk.
Planu ne’e konsege realize duni iha tinan 2011. Sira husi organizasaun Haburas lori modelu pasta ida suku ho plastic fo hau atu halo tuir. Iha tempu ne’eba duni hau halibur material sira hanesan plastiku mie sedaap nian, So Klin, ABC moca, Segar Sari no seluk tan durante fulan ida hau komesa koko no iha duni rezultadu 50 pasta. Ne’eduni ba Feto maluk sira iha interese lalika tauk atu koko no aprende,” dehan Elda Perreira, responsavel GFH semana kotuk (04/02) bainhira partisipa iha lansamentu loja Hamahon Feto Timor (HAFOTI) iha Vila Verde, Dili.
Nia haktuir, kreatividade halo pasta ho plastiku ne’e sira halo ona promosaun iha Feira Fiar ne’ebe governu liu husi Ministeriu Turismu Komersiu e Industria (MTCI) loke iha area Kristu Re’I nian sesta-sesta.
“Maske laiha fatin maibe ami koko tau iha kolega ida nia fatin no iha turista barak sira interesante tebes ho pasta ne’e e ida ne’e sai hanesan motivasaun ida ba ami atu promove diak liu tan kreatividade ne’e,” nia katak.
Iha mos difikuldade ne’ebe sira infrenta mak kona ba fatin ba grupu ne’e hodi halibur malu hamutuk atu promove diak liu tan sira nia produsaun ne’e.
Tanba ne’e, Responsavel Pereira dehan GFH oras ne’e dadaun buka hela doadores sira atu suporta nune’e bele promove diak liu tan produtu ne’ebe sira iha.
Iha lidun seluk Celeste da Costa, membru Grupu Feto Leno Dalan (GFLD) husi Distritu Viqueque, agradese ba organizasaun HAFOTI ne’ebe fahe ona sira nia kunesementu ba sira liu-liu iha area merkaduria tanba liu husi produtu ne’ebe iha bele fo benefisiu ba sira nia moris.
“Aktividade ne’ebe ami durante ne’e halo mak produtu kripik Ai-farina, hudi, marmelada, mina virgen, geli goiabas no seluk tan. semana ida ami produs dala rua liu husi produtu sira ne’e ami bele hetan osan hodi sustenta ami nia familia,” dehan da Costa.
Alende tau iha Loza HAFOTI, nia hatutan sira mos iha kliente ne’ebe tau sira nia produtu ne’ebe sira produs iha loza Landmark Plaza no Lita Store.
“Funsiunariu sira iha Viqueque mos sosa no liu-liu ba turista sira ne’ebe ba vizita iha Distritu ne’e kuandu sira atu sosa sira ba iha ami nia sentru,” nia informa.
Grupu feto sira ne’e mos pronto atu fahe sira nia esperiensia ba joven sira liu-liu joven feto ne’ebe la konsege remata eskola ka remata eskola maibe la konsegue kontinua sira nia estudu iha nivel universidade.
