“Fos husi produtu local deit husi nasional la kobre ona, entaun tenke importa husi liur ho presu ne’ebe karun tuir presu internasional,” hateten Deputadu Hugo iha Parlamentu Nasional, Dili, semana kotuk (03/02).
Tuir nia alende depende ba sassan importado, Timor-Leste mos sei uza moeda dolar Amerikanu nian.
“Se ita iha moeda rasik, ita bele produs ita nia osan para bele halo intervensaun no inflasaun ita bele rezolve,” hateten tan Deputado Hugo.
Nia afirma, dalaruma importador sira espekula tau iha armazen hasai oituan-oituan depois halo provokasaun nia presu.
“Ho intensaun halo lei asaun brankamentu ne’e halo intensaun ida ne’e, la’os intensaun atu hatun sasan nia presu, atu kontrola pratika merkadoria nebe mak emprezariu sira halo,” nia katak.
Kona ba Lei Tributaria nebe halo iha 2007, Deputadu Hugo dehan Lei Tributaria muda politika kona ba taxa ninian.
“Lei tributaria ne’e ema balun dehan la susesu, susesu, lei tributaria ne’e hatun tiha taxa husi taxa aas to’o taxa ki’ik oan”.
Entertantu Prezidente Komisaun C, Deputadu Manuel Tilman, hateten sasan folin kontinua sae tanba ro husi Surabaya-Indonesia nebe tula sasan tama mai Timor karun liu fali kompara ba Portugal.
“Ida seluk mak ro tama tenki hatun kedas naha, depois portu ne’e mos tenki klaru, se la’e ro tama la hatun naha ohin, aban tenki hasa’e tan nia presu tanba tenki selu imposto ba ida ne’e, ida neba,” Deputado Tilman tenik.
Nia hatutan tan katak, dala ruma nesesidade baziku sira sa’e makas tamba impaktu huis ro nebe mak tula sasan mai wainhira fila mamuk deit entaun selu hotu ba mai.
Tuir Deputado Tilman atu hatun folin sasan iha merkado primeiru tenki regula tiha transportes importasaun, produsaun, setor distribuisaun e mos konsumidores.
“Depois ita produs fali sasan nebe komersial, se ita tau hanesan Ermera sira, Liquisa sira, produs masan, uvas, ida ne’e mak produtu nasional sira nebe han hemu iha Restaurante sira bele hetan osan. Agora produs kami se mak han, e semak hola kami,” Deputado Tilman kestiona.
