“Ami nia preokupasaun iha festa demokrasia mak ami husu ba komponente tomak ne’ebe mak involve iha festa ida ne’e favor ida bele tau mos matan ba ita nia labarik sira tanba ita lakohi akontese tan hanesan iha elisaun tinan 2007; iha labarik lubuk ida sai vitima entau iha vez ida ne’e ami hakarak fo hanoin fali ba komponente hotu katak respeita labarik sira,” dehan Komisaria KNDL, Adalgiza Ximenes Magno, foin lalais (2/2) iha salaun STAE, iha Kaikoli, Dili.
Komisaria Magno katak KNDL la’os bandu labarik atu assesu ba periodu elisaun tanba ne’e direitu fundamental ida maibe husu ba inan-aman no professores sira atu tau matan ba labarik sira atu labele involve iha fatin kampania sira.
“La’os dehan fatin sira ne’e risku ba violensia maibe atu halo protesaun ba labarik sira,” nia katak.
Tanba ne’e, KNDL sei halo nafatin sosializasaun ba komunidade atu bele komprende involvimentu labarik iha kampania ne’e ladiak no sira fiar katak ho sosializasaun ne’ebe sira iha sei la akontese tanba inan aman mos lakohi oan sai vitima.
“Hanesan Timoroan no funsionario do estado ita iha obrigasaun atu informa ba komunidade sira katak labele involve labarik sira ne’ebe idade seidauk to’o iha aktividade politikas maibe sira tenke ba eskola tanba sira mak futuru nasaun nian. Se ita lori labarik sira iha aktividade politikus mak hetan barulho ruma karik labarik mak sai vitima,” dehan Diretor Jeral STAE, Tomas do Rosario Cabral.
Diretor Cabral hatutan katak kordenador sira husi 13 distritus iha obrigasaun atu koalia ho Administrador Distritu no Sub-distritu, Lideransa Komunitaria, Partidus Politikus sira, kandidatu sira no religious sira tanba hakarak festa demokrasia ne’e sussesu ho paz no estabilidade.
“Se prosesu advokasia sira ne’e lao maibe labarik kontinua involve iha periodu kampanha, Comisaun Nasional da Elisoens (CNE) no Polisia tanba polisia mak fo autorizasaun uza espasu halo kampanha eleitoral ne’e tenke fortifika partidus politikus sira no kandidatus sira katak involvimentu labarik ne’e ladun diak.
Tanba ne’e tuir nia, iha tempu badak KNDL no STAE sei hala’o sorumutu ida ho lideransa partidus politikus no polisia sira atu koalia mos konaba prevensaun involvimentu labarik iha kampanha no elisaun.
