Departamento de Comunicação Social (DCS), Faculdade de Ciências Sociais e Políticas (FCSP), Universidade Nacional Timor Lorosa’e (UNTL), iha ona espasu podcast ida atu fasilita estudante sira hala’o prátika jornalizmu no prepara an ba futuru profisionál.
Diretora DCS, Constancia Sofia Cornelio Barros de Jesus, hateten katak podcast Departamentu Komunikasaun Social sei foku liu ba asuntu akadémiku no dezenvolvimentu koñesimentu.
“Podcast ne’e sei sai espasu ida atu fahe informasaun kona-ba asuntu akadémiku sira. Dadaun ne’e ami hahú ona halo gravasaun no diskute tema sira ne’ebé relevante ba estudante no komunidade akadémika,” nia hatete.
Nia hatutan katak podcast ne’e mós sei loke oportunidade atu ko’alia kona-ba asuntu sira seluk no konvida bainaka relevante sira atu partisipa iha diskusaun.
“Iha futuru, podcast ne’e sei aborda mós asuntu sosiál no tema seluk ne’ebé relevante ba Timor-Leste. Ami sei konvida bainaka sira atu fahe sira-nia esperiénsia no haree ba asuntu hirak ne’ebé importante ba nasaun,” nia dehan.
Iha parte seluk, estudante DCS, Aida Amaral, hateten katak ezisténsia podcast ne’e sei ajuda estudante sira hodi prepara an di’ak liután ba futuru profisionál.
“Bainhira podcast ne’e la’o regular ona, ami bele prátika beibeik no hadia ami-nia abilidade komunikasaun. Ida-ne’e sei ajuda ami atu prontu liután bainhira tama iha indústria média no prepara ba futuru profisionál,” nia hatete.
Entretantu, Magnífiku Reitór UNTL, Joviano António da Costa, hateten katak podcast ne’e kria espasu diálogu ba komunidade akadémika no ajuda estudante sira dezenvolve kapasidade profisionál iha era dijitál.“Podcast ho naran Komunikasaun ba Mudansa reforsa inisiativa ida-ne’e hodi kria espasu ba diálogu, partilla koñesimentu no valoriza produsaun akadémika husi dosente no estudante sira. Liuhusi plataforma ida-ne’e, sira bele prátika no dezenvolve abilidade profisionál iha mundu dijitál, atu kontribui ba dezenvolvimentu nasionál,” nia hatete.
