Tuir Diretor Secretariadu Tecnico Administrasaun Eleitoral (STAE) Tomas do Rosario Cabral bazeia ba Baze de Dadus Eleitoral, total eleitores iha Timor laran tomak ne’ebe sei partisipa iha Eleisaun Jeral 2012 mak hamutuk ema nain 628.454.
“Eleitores ne’ebe iha direitus atu fo sira nia votus ba Eleisaun Presidensial iha 17 de Marsu, husi numero eleitores ne’ebe iha mudansa oituan ho eleisaun ne’be halao iha tinan 2007 ne’ebe iha momentu ne’eba iha eleitores hamutuk 500 mil resin Timoroan avansa maka’as tebe tebes husi 500 mil ba 628 mil,” dehan Diretor Jeral STAE Tomas do Rosario Cabral, semana kotuk (03/02) iha nia knar fatin Kaikoli, Dili.
Tuir Diretor Cabral katak total sentru de votasaun hamutuk 630, sentru de votus hamutuk 850 e iha sukus hamutuk 442 sukus.
Nia hatutan iha eleisaun tinan ne’e sei hetan apoiu husi Nasoes Unidas no mos iha apoiu koperasaun ida ho Portugal liu-liu iha parte material juridiku ba eleisaaun nian ne’ebe sei uza lian Portugues.
Partisipa iha rezultadu atualizasaun baze de dadus ida ne’e maka husi komisarios sira husi Comisaun Nasional De Eleisaun (CNE) ne’ebe maka sei halao aprovasaun ou fo legalidade ba rezultadu actualizasaun baze de dadus ida ne’e.
Hafoin hetan aprovasaun husi CNE maka rezultadu numero total votantes bele lori ba publika iha Jornal da Republika.
“Ami hanoin katak ida ne’e importante iha duni verifikasaun ba baze dedadus liu liu parte interesante hanesan kandidadu ho Partidu politico sira bele hatene total eleitors hirak mak sei partisipa iha eleisaun ba 2012. Nune’e mos bele fo biban ba sira atu bele halo sira nia estrategia no mos bele fo apoio ba sira nia kandidatura,” dehan Komisaria Sarmento.
Komisaria Sarmento hatutan importante liu mak iha transparansia iha publikasaun ba dadus hirak ne’e liu liu hanesan CNE nia knar ne’ebe atu tau matan atu asegura katak publikasaun dadus ida ne’e real duni no CNE lor-loron halo.
