Durante loron rua (08-09/02), Organizasaun Naun Governamental (ONG) Justice Sistem Monitoring Program (JSMP) ho suporta husi ONG Internasional Justice Facility halao treinamentu ba jornalistas korespondentes media imprimi no elektronik nasional inklui lokal iha distritu Oé-Cusse konaba Profesionalismu Jornalista hare liu ba Aspetu Legal.
“Objectivu husi treinamentu ida maka oinsa atu maluk jornalista sira halo kobertura ho profesionalismu sira nian, liu-liu hare ba aspetu legal, la ses liu kona-ba kode etik jornalista sira nian. Iha trenamentu ida ne’e fahe ba kapitlu tolu primeru kona-ba saida maka defenisaun husi Media ninian no mos defisinisaun kona-ba jornalista no mos Jornalismu,” hateten Treinadora Rita De Jesus Guterres.
Tuir nia katak dala ruma falhansu ne’ebe ke jornalistas no Media sira halo maka hanesan kazu Violasaun Sexsual jornalista sira halai ses husi sira nia kode etik tanba dala ruma sira hakerek notisia ho ema nia naran kompletu no sira sempre la subar ema nia identidade, inklui fo sai imagen kompleitu.
“Ne’e viola ona ema [vitima] sira nia diretu,” hateten Treinadora Guterres. “Hau espera katak ho treinamentu ida ne’e maluk sira bele hala’o knar no papel Media ka jornalista diak liutan atu labele haluha kode etik jornalista nian.”
Umbelina Belo husi Justice Facility hateten katak dadaun ne’e sira kopera ka suporta JSMP iha actividade rua ida maka Victim Suport Service (Servisu Suporta Vitima), VSS, no actividade seluk maka Legal Resource Unit (Sentru Rekursus Legal).
Formasaun ba jornalistas no media Enklave Oe-cusse halao hosi VSS.
“Treinamentu ida ne’e hetan suporta husi Justice Facility nian. Ami protu atu oferese nafatin treinamentu ba kolega jornlista sira hotu liu-liu konaba aspetu legal,” hateten Staff Belo.
Entertantu partisipante Costansio Ote, korespondente Diario Timor Post, Distritu Oé-Cusse, hateten katak Governu presiza hare kondisaun esbosu lei ba media atu nune bele proteje jornalista sira bainhira akontese akuzasaun ruma no mos bele hadai kondisaun Jornalista iha rai laran.
“Ami hanoin meios treinamentu husi Justice Sistem Monitoring Program (JSMP) diak tebes atu nune iha futuro Media bele iha mudanca pozitivu, hodi partisipa iha dezenvolvimentu liu husi divulgasaun infomasaun ne’ebé los tane aas Diretus Humanus no Justisa,” hateten korespondente Ote.
