“Projeitu sira ne’e Ministerio Saúde mak hakarak duni atu iha parteira, infermeirus barak tan atu tama tan ba iha komunidade tanba agora dadaun komunidade barak mak presiza. Maibe komu agora prosesu rekrutamentu laos fasil hanesan uluk Ministerio Saúde mak hare hotu maibe agora tenke liga ho Lei Funsaun Publiku no Ministerio Saúde sei hare sira nia dokumentus hotu foin halo rekrutamentu ne’e. Sira bele hein, ba sira ne’ebe funsionario Estado bele ba ona servisu maibe sira ne’ebe foun volontario lai foin ami bele halo prosesu,” dehan Vice Ministra Hanjam, semana kotuk (06\02), bainhira partisipa iha komemorasaun Loron Internasional Feto iha Parlamentu Nasional.
Vise Ministra Hajam mos rekonese katak sei menus rekursu umanu iha Sentru Saude sira liu-liu iha distritu sira maibe atu rekruta funsiunariu foun tenke tama iha pakote Orsamentu Jeral do Estadu.
Tanba ne’e husu ba Mediku Jeral no Enfermeiros sira ne’ebe iha kapasidade ona sira bele voluntariu iha Sentru Saúde sira ne’ebe iha maske lahanesan ho funsionario maibe sei prosesu tanba Ministeriu Saude presiza mediku no enfermeiros sira ne’e.
Iha parte seluk Vice Presidente Komisaun F, Deputado Francisco Jeronimo, hateten Governu iha obrigasaun atu halo kontratu lalais no nomea sira atu bele hala’o ona knar nudar pesoal saude tanba komunidade iha area rurais agora dadaun presiza mediku no enfermeiros sira nia tulun.
“Ministerio Saúde iha obrigasaun atu husu ba Konselho Ministru atu halo rekrutamentu ba graduadus sira ne’e no Konselho Ministru aprezenta ba iha Komisaun Funsaun Publika atu halo nomeasaun. Labele dun malu deit hanesan ne’e ladun diak ida tanba ita nia komunidade iha area rurais presiza hela ema sira ne’e nia tulun,” hateten tan Deputado Jeronimo.
