Hafoin halo fiskalizasaun ba servisu Unidade Polisia Fronteira (BPU) iha fronteira Fatululik, Distritu Covalima, Deputado Adriano do Nascimento, PD, nota katak Polisia Fronteira menus radio komunikasaun ne’ebe fo impaktu ba sira atu bele komunika malu.
“Iha fin de semana hau iha hau nia rai, triste teb-tebes, polisia sira iha fronteira ho Indonesia ne’e la iha kondisaun,” hateten Deputado do Nascimento, iha plenaria Parlamentu Nasional, Dili, semana kotuk (31/01).
Deputado Nascimento hatutan katak Komisaun B dalabarak ona hato’o kestaun ne’e ba iha Sekretariu Estadu Seguransa inklui komandante sira maibe laiha rezultadu.
“Polisia sira nebe mak jaga tesik Lebos ninian tun mai iha Fatululik ninian ne’e la iha radio komunikasaun, nebe sira uza deit handphone atu hato’o informasaun importante ruma ba iha distritu,” nia preokupa.
Alende falta radio komunikasaun, sira mos falta bee moos e durante ne’e sira sa’e kuda maka ba kuru bee iha fronteira.
“Hau lahatene kuda ne’e PNTL mak aluga ka sira mak sosa kuda,” nia kestiona.
Tuir Deputado do Nascimento problema ne’e la’os akontese deit ba Polisia Fronteira maibe polisia hotu-hotu radio ida deit tau iha postu deit.
“Ne’ebe hau husu ba Sekretariu Estadu ne’ebe tau matan ba Seguransa ne’e, osan ita aprova ona ba sosa HT [radio] ne’e tanba eleisaun besik ona hateten bebeik lakohi sosa, se ema halo infiltrasaun iha fronteira ita halo nusa,” nia kestiona.
Entertantu Prezidenti Parlamentu Nasional, Fernando Lasama de Araujo, nia parte senti moe tanba maske Parlamentu aprova ona orsamentu maibe la sosa radio komunikasaun ba polisia fronteira.
“Polisia importante, hau mos to’o iha ne’eba, radio ida be nia inan iha, ida be oan atu koalia ne’e la iha,” Prezidente PN Lasama tenik.
Hafoin Presidente PN Lasama ba vizita iha Polisia Fronteira nia hato’o kedas ba Sekretariu Estadu Seguransa, Julio Thomas Pinto, maibe Sekretariu Estadu rasik konfuzaun hela.
“Dehan atu sosa buat ida ne’e mais desde tinan kotuk to’o agora sosa nafatin, lahatene bainhira mak to’o mai,” hateten Prezidenti Parlamentu Lasama.
TDW koko konfirma asuntu ne’e ba iha Sekretariu Estadu Seguransa Pinto maibe la konsegue hasoru la koi fo komentario ba media.
