Komisaun Anti Korupsaun (KAK) konvoka sorumutu ida atu informa ba Parseiru Nasional ba Kombate Korupsaun kona ba prosesu revizaun ba Auto–Avaliasaun (Self Assessment Review) hanesan parte ida husi prosesu implementasaun ba Nasoens Unidas nia konvensaun Anti–Korupsaun (UNCAC).
Iha sorumutu ne’e mos debate kona ba oinsa atu dezenvolve planu estratejiko nasional ida atu kombate korupsaun iha Timor-Leste.
Parseiru Nasional sira nebe marka prezensa iha surumutu ne’e mak Prokuradoria Jeral da Republika (PGR) liu hosi Prokuradora Jeral rasil, Ana Maria Pesoa, PNTL liu hosi II Komandante Jeral Polisia Nasional Timor-Leste (PNTL), Superintendente Afonso de Jesus, Inspector Jeral Francisco de Carvalho, reprezentante husi Ministeriu Justisa (MJ), Ministeriu Negosiu Estranjeiru (MNE), Tribunal Distrital Dili (TDD) no Tribunal Distrital Baucau (TDB), Provedoria Direitus Umanu no Justisa (PDHJ), Banku Sentral Timor-Leste (BCTL), no reprezentante husi sosiadade sivil hanesan La’o Hamutuk, Luta Hamutuk, Judisial System Monitoring Program (JSMP), Asosiasaun Diretus Umanus no Konselho Nasional Juventude Timor-Leste (CNJTL).
“Ami iha enkontru ho KAK, ho Prokuradoria Jeral de Republika Dra. Ana Maria Pesoa, ho Tribunal, Polisia inklui mos NGO balun, involve Luta Hamutuk. Iha diskusaun ne’e atu halo self assessment ba iha implementasaun KAK nian. Ami kolia sobre assessment nebe maka ema internasional sira halo ho KAK no atu trasa planu ba oin, oinsa atu halo planu estratejia nasional ba kombate korupsaun,” dehan Joaozito Viana, Deputy Diretor NGO Luta Hamutuk, semana kotuk (27/01).
Nia hatutan mos katak NGO Luta Hamutuk em prinsipiu konkorda ho planu estrategiku nasional ba kombate korupsaun e mos tanba Luta Hamutuk sai membru ba ekipa atu halo draf para halo termus referensia hodi dezenvolve planu ida ne’e.
Entertantu Rogerio Viegas Vicente, Diretor Asosiasaun Direitus Humanu (Yayasan Hak) apresia ba KAK ne’ebe konvoka ona enkontru ida ne’e ho sira nia parseirus sira e enkontru ida ne’e hanesan enkontru ba dala uluk nian.
“Hau hakarak apresia ba inisiativa ne’ebe KAK foti atu konvoka enkontru ida ne’e e primeira vez akuntese bolu parseiru nasional sira hotu; liu-liu institusaun Estadu ne’ebe relevante atu tur hamutuk ho objectivu atu dezenvolve planu estrategiku ida oinsa maka atu kombate korupsaun nomos atu halo prevensaun ba asaun korupsaun ba futuru,” nia haktuir tan.
