Familia husi vitima JC lamenta tebes ho atitude membru Polisia Task Force nai ida ne’ebe alegadamente baku vitima durante halo patrulha iha area Colmera, Dili, iha tuku 8:00 kalan, iha semana kotuk (28/01).
“Polisia baku hau nia alin, hau la simu tanba nia la sala buat ida,” lamenta familia vitima, Jose Babo, bainihra mai hato’o keixa iha Parlamentu Nasional, Dili, semana kotuk (30/01).
Babo esplika katan vitima JC iha momentu kalan ne’e la’o hamutuk ho nia alin sa’e motor atu ba Lahane e sira nain rua uza kapasete hotu, maibe derepente polisia haruka sira para no baku kedas.
“Depois nia alin sira la baku, sira baku deit mak nia maun tun ba rai, depois polisia sira dehan o brani hader baku tan,” Babo konta.
Vitima JC labele tama eskola tanba agora sei baixa hela iha Hospital Nasional Guido Valadares (HNGV).
Tuir nia, familia vitima sira sei lori problema ne’e ba oin to’o hetan nia finalidade tanba atuasaun ne’ebe mak Polisia Task Force halo la los ida.
Entretantu Prezidenti Komisaun B Parlamentar, Deputado Duarte Nunes, hateten atuasaun membru polisia Task Force ne’e kontra lei tanba vitima la halo krimi.
“Hau hare surat ne’ebe mak hau simu, sira mos halo kopia ida ba Provedoria tanba iha neba mak depois hare hodi investiga labarik nia direitu iha nebe e tanba sa mak viola nia direitu hodi baku ne’e,” Deputadu Nunes dehan.
Tuir Deputadu ne’e, Polisia nia orden la’os atu tun ba baku ema, dala ruma hahalok ne’ebe mak Polisia ruma halo la tuir orden husi Polisia.
Deputado Nunes hatutan katak wainhira vitima ne’e la sala tenki halo sansaun ruma ba membru Polisa ne’e tanba iha Polisia nia laran iha regulamentu disiplinar e Komisaun B sei akompanha prosesu ba kazu ne’e to’o hotu.
“Nebe nia viola nia tenki hetan labele ses husi ne’e tanba Polisia ho Militar ninian regulamentu disiplinar hanesan hotu,” nia tenik.
