Relasiona ho postu-postu tranzitu ne’ebe to’o agora sei mamuk no abandonadu tanba menus rekursu umanu, tuir Komandante Tranzitu Nasional, Polisia Nasional Timor-Leste (PNTL), Superintendente Xefe Antonio L.C. Soares, katak polisia foun 250 foin tama ba forsa ne’e balun sei koloka ba iha polisia tranzitu.
“Kuandu sira hetan graduasaun ona, ami hanoin katak importante tebes husi 250 pesoas ne’e ita bele koloka mos balun ba iha Polisa Tranzitu,” hateten Superintendente Soares, semana kotuk (30/01), iha Kaikoli, Dili.
Superintendente Soares hatutan, kompara ho situasaun agora ne’ebe husi loron ba loron kareta no motor aumenta, presiza duni atu aumenta membru polisia tranzitu nune’e bele monta iha postu sira ne’ebe sei mamuk.
Entertantu Deputadu Jose Teixeira hateten kona ba kestaun ne’e nia parte sei husu iha Sekretariu Estadu Seguransa Julio Thomas Pinto tanba sa mak postu hirak sei mamuk.
“Ita bele dehan tanba karik rekursu laiha atu to’o iha neba, ami sei buka hatene husi Secretariadu Estadu Siguransa tanba sa maka situasaun ida ne’e hanesan ne’e,” nia dehan.
Deputado Teixeira se postu hirak ne’e la presiza e husik mamuk deit tanba sa mak uluk harii, ne’e hatudu katak jestaun ba orsamentu inklui rekursu umanu presiza hadia.
