Relasiona ho Forsa Defeza Nasional Timor-Leste (F-FDTL) iha de’it Kuartel Jeral, tuir Koordenador Peskiza Fundasaun Mahein (FM), Frei dos Martires da Costa Guterres, katak linha fronteira presiza prezensa F-FDTL tanba sira mak hanesan lutu ba soberania Timor-Leste.
“Ita nia sistema defeza ne’e iha konstitusional hateten katak ita nia forsa F-FDTL mak nudar lutu defeza, defeza ba soberania Timor-Leste, ker dizer ke defeza mak tenki halo atuasaun ou halo seguransa iha area fronteira para hasoru inimigu external, amiasa nebe maka husi liur e linha fronteira durante ne’e ita nia forsa defeza seidauk iha,” hatete Kordenador Guterres, semana kotuk (30/01) iha Balide, Dili.
Nia hatutan katak durante ne’e linha fronteira polisia fronteira mak hein, ida ne’e hatudu katak la tuir Konstitusaun nebe maka iha.
Entertantu Deputadu Jose Teixeira konkorda ho hanooin husi FM ne’e tanba kompara ho Indonezia, sira nia linha fronteira maske POLRI (Polisia Indonesia) mak iha oin maibe TNI (Defeza Indonesia) iha sira nia kotuk no tentara barak mak iha fronteira.
Deputado Teixeira mos fo hanoin kona ba passadu durante 24 anos ne’ebe foras resistensia FALINTIL, ne’ebe agora kompoin F-FDTL, konfronta malu ho forsa Indonesia TNI iha fronteira no nune presiza analiza situasaun ne’e ho diak atu evita insidente diplomatiku ruma entra nasaun rua Timor-Leste no Indonesia.
“Ita nia kestaun iha Timor-Leste ne’e ita komprende katak kestaun ne’e sensivel ituan tanba ne’e maka nunka tau ita nia F-FDTL iha fronteira ne’e ba.”
Nia haktuir, mekanismu seguransa iha fronteira ne’e laiha amiasa externa ida maibe karik presiza reforsa ita nia unidade patrolhamentu iha fronteira ho F-FDTL balun.
“Ita bele halo ligasaun tanba sira nia TNI mos la do’ok husi ita iha sorin ne’eba, mais laiha ameasa ida husi Estadu ida, ne’e duni nesesidade atu tau F-FDTL iha Fronteira ne’e laiha,” katak Deputado Teixeira.
