Tuir peskiza Fundasaun Mahein (FM) halo kona ba Konselhu Superior Defeza no Seguransa (CSDS) nian nebe xefia direitamente husi Xefe Estadu no Prezidente da Republika Jose Ramos Horta, nota katak sei hasoru dezafiu bo’ot kona ba servisu iha nivel sekretariadu ninian tanba seidauk iha preparasaun ne’ebe diak liu liu wainhira konvoka reuniaun altu nivel.
“Tanba ne’e mak peskiza ne’ebe mak Fundasaun Mahein halo nota katak sei iha dezafiu bot iha servisu konselhu superior defeza no seguransa ninian,” hateten Peskizado FM, Joao Almeida, iha Balide, Dili, semana kotuk (20/01).
Pesizador Almeida dehan tuir los CSDS konvoka reuniaun fulan tolu dala ida no Xefe Estadu konvoka kualker tempu tuir situasaun nebe akontese iha rai laran.
Nia haktuir, Servisu CSDS mak hanesan orgaun konsulta ida no ajuda Prezidenti da Republika hodi fo hanoin ka sujestaun ba kulaker asuntu iha rai laran no liur liu-liu ba setor defeza no seguransa.
“Failansu nebe mak Fundasaun Mahein hetan iha Konselhu Superior Defeza no Siguransa, failansu husi sekretariadu ninian, purzemplu servisu konaba preparasaun enkontru ninian, tanba sira seidauk iha preparasaun nebe diak,” nia hatutan.
“Ita hare iha nivel asaun atu hala’o enkontru ida ne’e sei iha frakeza balun, ezemplu preparasaun enkontru ninian, prepasaun kona ba buat ida ema bolu notulensia seidauk iha,” nia kestiona.
Entertantu Prezidenti Komisaun B Parlamentar, Deputadu Duarte Nunes hateten nia parte la hatene servisu CSDS nian tanba ne’e Xefe Estadu ka Prezidente da Republika nia knar.
“Tanba konselhu, ema fo konselhu deit, Prezidenti hakarak rona, rona deit, nia bele fo hanoin, bele fo buat hotu depende Prezidenti mak hola desizaun,” nia dehan.
Tuir Deputadu Nunes, iha CSDS buat hotu Prezidenti da Republika mak desidi la’os Konselhu.
