“Estudante Cubanu nebe fila mai halo aprendizajen, halo pratika iha Timor-Leste, infelizemente fatin ne’ebe mak Governu promete dehan 2010 tenki hotu ona para atu sira bele hela maibe to’o horas ne’e dormitoriu mos la iha atu sira hela,” hateten Deputadu Jeronimo iha plenaria Parlamentu Nasional, semana kotuk (31/01).
Tuir Deputado Jeronimo problema ida ne’e presiza hetan atensaun husi komponente hotu liu-liu Ministeriu Saude (MS).
“Sira toba hanesan animal e ida ne’e sai preokupasaun ita hotu nian,” nia dehan.
Nia dehan estudante medisina sira ne’e para atu sai doutor ne’ebe kualidade ba futuru Timor-Leste nian maibe, “ita nia preparasaun hanesan ne’e la permiti atu sai doutor nebe diak.”
Deptuado Jeronimo informa mos katak laos deit fatin dormitoriu deit maibe be mos hodi sira konsume lor-loron mos la iha.
Entertantu Deputadu Domingos Mesquita hateten uluk governu promote ona katak bainhira estudante sira ne’e fila husi Cuba governu harii ona dormitoriu ba sira maibe realidade laiha.
“Maibe realidade to’o agora barak mak sidauk hetan fatin, no mos asesu ba bemos mos ladun iha,” hateten Deputado Mesquita.
Nia hatutan tan katak, subsidiu ne’ebe mak Governu fo hodi halao sira nia estudus la sufisiente atu sustenta sira nia aprendizajen.
“Hau hanoin karik ida ne’e failhansu husi Ministeriu Saude para atu rezolve problema ne’e lalais, I karik tempu mos badak ona, karik Governu foun mai bele hatutan fila fali programa hirak ne’e,” nia katak.
Tuir Deputado Mesquita, dormitorio importante teb-tebes ba estudante no mos doutor sira atu sira bele hela.
“Para pelo menus fasilita sira hodi halao sira nia servisu ho diak, iha area rurais sira,” nia informa.
