“Hau hanoin nia bele fila-fali ba nia escola bain bain hamutuk ho nia kolega sira tanba sira la’os halo krimi, ou sira bele tama iha ensino rekorente tanba ensino ne’e loke ba ema ne’ebe la remata escola,” hatete Deputada de Carvalho semana kotuk, (01/02) iha Parlamentu Nasional, Dili.
Tuir nia, iha lei ensino baziku preve ona katak ema ne’ebe la remata escola ho idade liu tiha ona governo tenki loke ensino recorente nune’e sira bele halo hotu sira nia estudu.
Tuir nia, kona ba atu loke eskola foun ba sira, komisaun seidauk halo diskusaun klean e mos Ministeriu Edukasaun (ME) seidauk koalia kona ba asuntu ne’e.
“Ami seidauk diskuti klean liu kona ba ida ne’e , e mos tanba Ministeriu Edukasaun (ME) rasik seidauk koalia ho ami kona ba asuntu ne’e,” Deputada De Carvalho katak.
Deputada ne’e hatutan, ida ne’e hanesan luta ida ba feto sira atu oinsa mak feto foin sa’e sira bele iha oportunidade atu hasa’e sira nia kursu, karik nia iha minoridade mak iha isin rua ne’e importante tebes katak nia iha direitu akaba nia estudu.
Tanba ne’e nia husu ba ME no Sekretaria Estadu Promosaun Igualidade (SEPI), atu hare asuntu ne’e ho klean, halo audensia ho entidade hotu fo hanoin ba malu, nune’e ikus la bele mosu dezentendementu iha publiku.
“Labele halo tiha lei e depois ema dehan lei iha tiha ne’ebe ema hotu hakarak atu halo tuir buat ne’ebe mak ladiak depois ba fali escola ne’e la diak. Halo lei ne’e diak maibe atu ezekuta ne’e kusta tebes,” nia dehan.
Iha parte seluk tuir Secretariu Sindikatu Professores Timor Leste (SPTL), Francisco da Conceicão da Silva, katak estudante feto ne’ebe isin rua tenke sai hosi eskola nune’e labele influensia fali estudante seluk.
“Depois de partus oan bo’ot sira bele mai fali eskola maibe lori ho kaderneta, nune’e eskola bele rekonese sira katak nia ami nia alunus duni,” da Silva katak.
Entertantu tuir Staf Sekretaria Estadu Promosaun Igualidade (SEPI), Carla Valente hateten hari eskola foun ba feto putus sekolah, hanesan meius ida ne’ebe presiza halo diskusaun ho entidade tomak.
