Tinan ba tinan numero estudantes husi nivel Escola Baziko to Universidade aumenta ba bebeik no ida ne’e hatudu pasu pozitivu ba dezenvolvementu nasional tanba signifika katak inan-aman sira iha rai laran iha ona konsiensia hodi haruka sira nia oan ba eskola tanba sira mos fiar katak liu hosi edukasaun mak bele hadia sira nia moris.
Maibe ina-aman no estudanes iha Distritu Enklave Oe-cusse nafatin halerik ba limitasaun sektor edukasaun iha sira nia distritu izolado no kontinua nafatin apela ba Governo liu husi Ministerio Educasaun (ME) atu loke tan escola iha Oe-cusse.“Ami nia oan sira barak maka eskola maibe sala maka la to’o. Imagina tok sala ida bele alunu to lima nulu ba leten bele fo impaktu ba edukador sira atu kontrola.
Wainhira atu escola privadu maibe karun tamba ne’e ami sujere ba Ministerio Educasaun atu loket tan eskola,” hateten Reprezentante Inan-Aman sira Distritu Oe-cusse, Justinho Mauno, foin lalais iha Kapital Dili.
Reprezentante Mauno hateten mos katak oras ne’e dadaun numero estudante aumenta maibe kestaun maka escola menus sala no ida ne’e bele halo alunu to lima nulu ba leten iha sala ida deit.
Entretantu Fransisco Pinto Soares, estudante finalista husi Escola Secundaria Santo António Oe-Cusse senti katak presiza governo loke tan eskola iha rai laran li-liu iha Distritus izoladu hanesan mos Oe-cusse atu evita estudante sira tenki escola fali iha Dili.
Hatan ba asuntu ne’e, Director Nasional Ensino Baziko, Ministerio Edukasaun (ME), Alfredo De Araujo, hateten katak alternativa husi ME atu bele asegura mak sira tenki rezolve buka hanesan sala provizorio ida para atu labele halakon direitu labarik ba prosesu aprendizajen.
“Konsekoensia mak tenki redus ona oras lectivas ne’ebe lolos atu enkoraja tempo aprendizasen ho efektividde. Ne’e oras hat ka lima bele reduz ba oras ida ka rua tempo de aprendizajen,” hateten Director Araujo.
