Autoridade komunitaria iha Distritu Enklave Oe-cusse liu-liui hosi Sub-Distritu Pante Makasar, preokupa ho kondisaun estrada iha Kapital Oé-Cusse ne’ebé loron ba loron kontinua aat liu tan no fo impaktu ba movimentu transporte iha enclave laran.
Xefi Suku Cunha Abilio Asqeli Xesta, iha semana kotuk (27/01) hateten katak tuir keixas ne’ebé maka nia hetan husi motoristas no komunidade balun katak kondisaun estrada kuak halo kareta mikrolet sira ladun halo operasaun tula passajeirus.
“Hau rona informasaun husi xofer sira katak agora dadaun ne’e sira ladun halo movimentu makas atu tula passajeirus tamba dalan iha kapital ne’e kuak barak ona bele estraga kondisaun kareta. No kondotor sira isin moras liu fali ema serbisu tos ka natar tanba kareta tatidik,” hateten Xefi Xesta.
Nia hatuir tan katak uluk molok estradas aat kareta hosi kapital Oé-Cusse ba Merkadu Tono lori deit minute tolu nulu deit maibe agora ho kondisaun estrada aat bele oras ida liu.
Entretantu Xefi Suku Nipane, Anselmos Colo, hateten kondisaun estrada husi fronteira Sakato ba Kapital Oé-Cusse ne’ebé maka iha tinan kotuk hetan rehabilitasaun liu husi Pakote Referendum, taka kuak ho rai, oras ne’e tahu barak tanba udan no iha tempu bailoron hamosu rai rahun sae hodi impaktu ladiak ba saúde komunidade sira ne’ebé hela besik estrada ninin.
Iha parte seluk mos, Direktur ONG lokal CECEO, Juvinal Faria, hateten katak kondisaun estradas husi loron ba loron aat ba bebeik ne’e hatudu imajem la diak ba enclave Oe-cusse nos mos ba nasaun tomak.
“Prossessu rehabilitasaun estrada iha Oé-usse laran ne’e diak maibe taka fali ho rai mutin. Iha tempo bai loron ita hasoru maka rai rahun sae. Udan fali tahu maka barak ne’e hau bele dehan Oé-Cusse tempo bai loron sidade rai rahun enkuantu tempo udan sidade tahu,” Xefi Faria hateten.
Hatan ba keixas ne’e Direktor Obras Publikas Distritu Oé-usse, Candido Dos Reis Amaral, konfesa katak nia parte bolu ona atensaun ba kompania joint ventura ne’ebé maka manan tender ba projetu rehabilitasaun estrada iha Kapital Oé-Cusse ne’ebé abandona hela.
“Hau bolu ona konsultan mai iha ne’e no fo ona xamada de atensaun ba emprezario konaba projeitu ne’ebé maka abandona no fo atensaun mos ba sira [kompania] ne’ebé maka tama iha joint ventura konaba estrada sira ne’ebé maka iha tempu udan bee nalihun atu ateru tiha,” Direktur Amaral informa.
TDW tenta konfirmasaun ho responsavel Joint Ventura Fernando Mag maibe la konsege tamba nia la disponivel atu koalia ho media.
