Estudantes Suku Bahalara-uain, Viqueque, nia assessu ba sektor edukasaun limitadu tebes nune, lideransa komunitaria husu ba Ministerio Edukasaun atu harii tan eskola ensino sekundaria iha sira nia area tanba hare ba volume estudante ne’ebe kada tinan aumenta ba beibeik no situasaun ekonomia uma laran ne’ebe la sufisiente atu supporta oan atu asesu edukasaun iha kapital Dili.
“Ami nia hakarak atu harii eskola ensino sekundaria ida iha ne’e tanba volume alunus barak mak la kontinua sira nia estudu tanba iha ne’e ensino sekundaria laiha. No sira labele ba kontinua iha kapital tanba ho kondisaun ekonomia ne’ebe la sufisiente entau desizaun ikus mak sira tenke forma uma kain sedu,” dehan Chefe Suku Bahalara-uain, Zeques Pinto, semana kotuk (20/1).
Nia hatutan katak sira identifika ona rai atu harii eskola ensino sekundaria iha sira nia suku no se sira nia proposta ne’e hetan aprovasaun husi ME komunidade pronto atu oferese rai ho volume hectares lima resin atu harii konstrusaun eskola iha sira nia komunidade laran.
Chefe Pinto katak mos preokupasaun ne’ebe lideransa komunitaria koalia ne’e laos mai husi lider komunitaria sira maibe mai husi komunidade no estudante finalista pre-sekundaria sira nia preokupasaun.
Hatan ba kestaun ne’e Vice Ministru da Edukasaun, Paulo Assis Belo hateten katak tuir estatistika komunidade Suku Bahalara-uain merese duni hetan tan ensino sekundaria ida iha sira nia suku maibe ME seidauk bele responde ba sira nia ezijensia tanba kondisaun miniterio mos sei limitadu.
“Ita tenke hare mos kondisaun tanba ita harii ensino sekundario ne’e tenke iha infra-struktura ne’ebe makas katak tenke iha laboratorium no biblioteka. Depois mak ita hare, hau nia hanoin knar ida ne’e governu foun mai mak bele hare tanba governu ida ne’e to’o ona fin ano, ne’eduni ita labele halo promesa ba povu,” dehan Vice Ministru Belo.
Nia hatutan tan katak justifikasaun ne’ebe lideransa komunitaria fo ne’e realidade duni tanba labarik barak mak la kontinua sira nia eskola tanba ensino sekundaria iha sira nia suku laiha entau sira tenke lao dok ho ida ne’e labarik barak mak abandona eskola no desizaun ikus mak kaben sedu.
