Atu prevene feto no labarik husi violensia hotu iha rai laran, Asosiasaun Mane Kontra Violensia (AMKV) sei fo treinamentu ba Focal Point Distritais atu hasae liu tan sira nia konsiensia no konesementu kona ba igualidade jeneru atu nune’e bele koko redus numero vitima violensia domestika.
“Ami iha programa barak maibe ami iha programa rua mak espesifiku liu hanesan programa Community Organize. [Treinamentu] hanesan diskusaun, reflesaun, seminariu iha distritu hamutuk 10 to’o iha sub-distritu inklui mos ba Administrador Distritu no Sub-distritu, Lideransa Komunitaria, Polisia, grupu joventude sira. Tanba sira mak besik liu ba iha komunidade, entau sira bele pasa informasaun ba komunidade sira kona ba ba prevensaun ba violensia hotu bazeia ba jeneru no promove advokasia mak halo rede servisu ho parseiru sira hodi halo promosaun ba programa ne’ebe iha,” hatete Koordenador Programa AMKV, Filomeno Monteiro, semana kotuk (26/1), iha Farol, Dili.
Kordenador Monteiro hateten tan katak Distritu ne’ebe sira atu halo kontinuasaun treinamentu mak Distritu Aileu, Ainaro, Same, Suai, Maliana, Lospalos, Viqueque, Ermera no rua seluk tan iha treinamentu ne’e sira uza manual ne’ebe ho titlu Mane Hamenus Violensia Kontra Feto.
Tuir nia, mane mak hanesan parseiru promosaun igualidade jeneru no prevensaun ba violensia tanba atu prevene violensia tenke liu husi treinamentu, diskusaun no refreksaun ba ema ida-idak hodi bele.
Koordenador Moonteiro hatutan SEPI la’os deit suporta osan ba sira maibe AMKV sai parseiru ba SEPI, nune’e mos sira foin dadauk involve mos iha programa kampania loron 16 ba violensia domestika no hetan supporta finanseiru husi SEPI.
“Hau hanoin atu promove iqualidade jeneru ne’e laos iha nasional deit maibe presiza mos iha area remota tanba ne’e SEPI tenke aumenta tan vocal point husi SEPI iha distritu no sub-distritu to’o iha suku nune’e bele halo promosaun hodi bele promove iqualidade jeneru iha baze ne’e diak liu tan,” dehan Kordenador Monteiro.
Iha lidun seluk, Sekretaria Estadu SEPI, Idelta Maria Rodrigues, hateten sira prontu nafatin atu kolabora ho organizasaun sira hodi bele promove nafatin igualidade jeneru iha rai laran liu-liu iha baze.
“Ami sei nafatin fo supporta ba sira oinsa atu hasae konsensia no koinesementu ema hotu nian ba igualidade jeneru atu nune’e bele prevene violensia domestika no redus numeru vitima violensia hotu hasoru feto,” dehan SE Rodrigues.
