Sekretaria Estadu Promosaun e Igualidade (SEPI) sei fo formasaun liu hosi programa Maneja Hirus ba prizioneiru sira e mos ba joventude sira nune’e hahalok hanesan labele akontese tan iha futuro.
“Objetivu husi programa ne’e atu eduka prizioneiru sira nune’e labele akontese tan attitude ne’ebe halo sira tama prizaun hanesan agora ne’e, e bainhira sira fila ba uma labele halo tan,” hatete Filomena Babo Martins, Xefe Departementu Formasaun e Edukasaun, SEPI, semana kotuk (27/01), iha Dili.
Xefe Martins hateten tan katak inisiativa ne’e koko atu reabilita prizioneiru sira atu bele kontrola diak liu tan sira nia hirus. Programa ne’e mos sei implementa ba juventude atu prevene sira uza hahalok hirus ne’ebe bele halo mosu violensia atu rezolve sira nia problema.
Nia hatete atu implementa programa ne’e SEPI servisu hamutuk ho Ajensia Nasoens Unidas UNFPA.
Entertantu Luiza Marçal, Kordinadora Uma Hakmatek NGO Psychosocial Recoperaaun no Dezenvolvementu iha Timor-Leste (PRADET), hatete programa Maneja Hirus ne’e hanesan maneira ida atu oinsa mak hamenus to’o nivel normal hikas ema hirak ne’e nia hirus.
“Ne’e hanesan teknika ida ke atu halo bainhira kuandu ita nervozu demais ita tenser kolia ba ema nebe maka nervozu-dor ne’e ita uza maineira saida para nia hirus ne’e bele normal fila-fali. Ne’e bain-bain halo ba suspeitu sira nebe maka iha prizaun para sira bele mantein sira ninia mental no sira nia emosaun ne’e labele sae fali to’o iha puncak mais halo neutral hela deit,” dehan Kordenadora Marçal.
Tuir nia, wainhira ema nebe iha prizaun ne’e la kontrola sira nia hirus entaun sira bele oho aan ka oho ema seluk.
“Ida ne’e akuntese tanba suspeitu lahatene atu kontrola nia hirus ou maneja hirus tanba laiha ema ida maka halo prevensaun ba ida ne’e. Ne’e duni objetivu husi programa ne’e hanorin sira oinsa atu maneja sira nia emosional, no maneja sira nia hirus,” nia katak.
