Komandante Polisia Nasional Timor-Leste (PNTL) ba distritu Viqueque husu ba joventude sira iha Suku Bahlaruain atu hadomi sira nia uma-eskola tanba uma-eskola hanesan uma lulik ida atu prepara ema hodi kaer nasaun Timor-Leste, relasiona ho esperensia katak problema mosu uma-eskola sira mak sai vitima ba joventude sira nia agressividade.
“Hau husu ba joven sira iha suku Bahalara-uain (Viqueque) atu hadomi Uma Eskola tanba hau hatene ita bo’ot sira iha tinan rua liu ba kuandu halo problema ruma, Uma Eskola mak sai vitima tuda-rahun, liu-liu joven sira ne’ebe involve iha organizasaun artemarsias sira; maibe
agora hau iha ona despaisu ida husi nasional atu kontrola artemarsiais ne’e duni hau sei la perdua kuandu hare joven sira hatais metan–metan,” dehan Komadante PNTL Distritu Viqueque, Justinu Menezes, semana kotuk (20/1), iha Viqueque.
Komandante Menezes hatutan katak ba joventude sira ne’ebe buka problema ho uma-eskola ka tuda raun uma-eskola nia vida tomak sei la hetan matenek sei fo malisaun ba nia nia jerasaun sei lahetan matenek.
Komadante mos apela mos inan-aman sira atu respeitu professores sira Ensino Basiku sira tanba sira mak hanorin labarik sira sai matenek labele buka problema ho professores sira.
Iha lidun seluk, Chefe Suku Bahalara-uain, Jaques Pinto, hateten katak ema barak dehan suku Bahlaruain iha tinan rua liu ba sempre mosu problema entre artemarsiais entau uma eskola mak sai vitima; maibe komesa iha tinan 2010 to’o mai agora laiha problema hanesan ne’e tan tanba lideransa komunitaria halo koperasaun servisu ho polisia Distritu Viqueque atu halo sosializasaun no kolaborasaun ho joventude, organizasaun atremarsiais no komunidade entau situasaun agora lao diak.
“Hau fiar katak joventude iha suku Bahlaruain sei la halo tan problema no la tuda tan uma-eskola tanba ami halo komunikasaun diak ho sira entre joventude, organizasaun artemarsiais. Ami sei hamutuk kuidadu uma eskola sira iha ami nia suku laran.”
