Membru Parlamentu Nasional husi Komisaun A oras ne’e dadauk halo hela diskusaun kona ba lei rai nian iha Sub-distritu Maubara,Distritu Liquisa, nune’e molok tama ba loron kampanha eleisaun nian lei ne’e bele aprova ona.
“Lei ida ne’e importante teb-tebes atu regulariza rai iha teritoriu Timor-leste tomak tanba ita nia komunidade barak mak sala utiliza rai iha ita nia nasaun ne’e,”hateten Deputadu Francisco de Araujo iha PN,semana kotuk,(18/01).
De Araujo hateten,maske Timor-leste nasaun ki’ik ho nia populasaun juta ida resin maibe oras ne’e dadauk kazu hadau malu rai buras tanba ne’e presiza lei ida ne’e atu regulariza.
“Problema rai , iha Timor sensitive teb-tebes tanba rai ne’e okupasaun barak mai husi Portugues ba to’o Indonesia e mai to’o independensia ita hare problema rai bo’ot teb-tebes iha ita nia nasaun ne’e,”nia observa.
Tuir nia,problema rai iha buat tolu ;direitu uza de’it, direitu ba jerasaun, no ida rai ba komunitariu.
“Entaun lei agora dadauk iha hela komisaun A ninia liman,sira sei trata hela lei ne’e to’o hotu para hodi defini lolos,”nia katak.
Entertantu Deputadu Domingos Mesquita sublina katak, lei ne’e iha hela komisaun A e sira debate hela tanba molok tama ba kampanha eleisaun presidensial nian bele aprova ona.
“Komisaun A agora konsentra hela iha Maubara ,kuaje semana rua ka tolu iha neba para focus, “nia dehan.
Tuir Mesquita katak, antes mandatu ida ne’e remata pelomenus lei rai nian bele aprova ona iha parlamentu hodi bele implementa.
Iha fatin seluk komunidade Caicoli, Lorenso Freitas hateten,to’o agora komunidade sira iha kapital Dili no distritu barak mak hadau malu rai tanba seidauk iha lei ida atu defini lolos problema rai komunidade sira nian.
“Agora ami deit ,ami nia familia nia rai ema hadau dehan fali sira nia rai maibe rai ne’ebe ema hadau ne’e uluk hau nia familia rasik mak hateten ba ema ne’e hela iha sira nia rai tanba momentu Indonesia nia tempu sira la iha rai no uma atu hela maibe to’o ikus ami nia familia sira ne’e konsege hatudu sira nia rai hodi hela provizoriu ,to’o ikus sira dehan fali sira nia rai,” Freitas dehan.
Tanba ne’e mak nia husu ba Governu atu aprova lalais lei rai nian atu nune’e bele regulariza ba direitu rai ema idak-idak nian.
Enkuantu TDW koko konfirma asuntu ne’e ba Ministra Justisa maibe lakonsege tanba Ministra Lucia Lobato la iha fatin atu responde asuntu ne’e.
