Atu garante seguransa ba labarik sira ne’ebe involve iha kampanha Partidus Politiku (Parpol), Komisaun Nasional ba Elisaun (CNE) presiza kria lei ida ba labarik sira ne’e.
“Ami nudar sosiedade sivil ida ne’ebe servisu iha area protesaun ba labarik ami iha esperensia no rezultadu monitorizasaun ne’ebe ami iha durante kampania elisaun jeral tinan 2007 labarik hamutuk nain 13 mak sai vitima tanba involve iha kampania partidu politiku e laiha ema ida mak responsabiliza tanba ne’e ami husu ba CNE tenke iha mos politika ida ne’ebe klaru no bele tau mos kestaun ne’e iha plataforma unidade nasional nune’e partidus politikus sira bele hatene no tau iha konsensia,”hateten Honorio Soares Almeida,semana kotuk (16/01) iha Kaikoli Dili.
Nia haktuir,maske labarik iha direitu atu involve iha vida politika maibe la signifika katak uza labarik hanesan instrumentu atu atinji objetivu partidus politikus e ikus mai labarik sira .
Almeida afirma, FTM durante ne’e halo hela programa advokasia ho CNE no partidus politikus sira kona ba politika saida mak sei halo atu minimize involvimentu labarik iha prosesu kampania nune’e labarik sira labele sai vitima hanesan iha tinan 2007.
Iha lidun seluk membru komisariu CNE, Sergio Hornai hateten partidus politikus sira tenke iha konsensia atu labele uza labarik ho minoridade ba iha interese politika no pesoal iha sosiedade ida nia laran .
“Ne’e labele. lei admite deit labarik bele partisipa iha eventu ne’ebe halo sira espresa sira nia vontade atu halimar maibe labele uza labarik iha interese ne’ebe laiha relevante ho labarik,”nia dehan.
Iha parte seluk Deputada Maria Paixão hateten labarik ho idade minoridade sira sei la involve iha kampanha partidus politiku tanba CNE sei tau atensaun tanba lei eleitoral katak ema ne’ebe tuir kampanha iha direitu atu hili ema ne’ebe ho idade 17 ba leten no konstituisaun mos admite ida ne’e.
