Liu hosi koperasaun servisu entre Ministeriu da Edukasaun (ME) ho parseiru dezenvolvimentu United Nations Children’s Fund (UNICEF) iha semana kotuk (19/1) Vice Ministru Ministerio Edukasaun (ME), Paulo Assis Bel, ho reprezentantes UNICEF halao serimonia inagurasaun ba eskola filial Uailalika, Distritu Viqueque, Sub-Distritu Uatolari.
Prosesu konstrusaun halao husi Kompania Natureza Furak ne’ebe hetan fundus husi UNICEF ho montante US$23 Mil tanba tuir UNICEF katak atu dezenvolve nasaun tenke alkansa edukasaun tanba edukasaun nudar save inportante ba dezenvovimentu nasional.
“Husu ba komunidade Uailalika atu kuidadu didiak eskola ne’e tanba labarik barak mak ohin loron abandona sira nia eskola. Ema barak dehan abandona tanba la hatene lingua Portugues maibe lae; abandona tanba eskola dok tenke lao kilometru 50 entau sira idade ki’ik balun 6 anus baruk lao dok entau lakohi ba eskola. Ne’e duni hau husu ba komunidade no inan aman sira atu kiudadu didiak eskola ne’e nune’e labarik sira bele aprende iha laran ho diak,” dehan Vice Ministru ME Assis semana kotuk (19/1) iha sub-Distritu Uatolari, Distritu Viqueque.
Iha lidun seluk, reprezentante UNICEF, Ritta Pountiainen, hateten katak nia sente kontente tanba bele ajuda ona labarik sira iha Suku Uailalika atu asesu ba edukasaun no nia mos hato’o agradese ba kompania no inan aman sira ne’ebe kontribui ona hodi halao konstrusaun ne’e to’o remata.
“Hau husu komunidade no inan aman sira atu suporta nafatin labarik sira nune’e sira bele hela nafatin iha eskola hodi asesu ba edukasaun nune’e sira bele remata sira nia eskola liu-liu ba labarik feto sira ne’ebe barak husik hela sira nia eskola tanba lao dok,” dehan Reprezentante UNICEF Pountiainen, iha nia diskursu Durant serimonia inagurasaun Eskola Uailalika.
Nia hatutan katak UNICEF sei kontinua fo apoiu saneamentu baziku no bee mos nune’e mos eqipamentu musika no desportu nian no alende ne’e UNICEF sei fo treinamentu formasaun ba profesores sira liu-liu oinsa labarik sira atu aprende tanba dala barak labarik sira laos aprende deit iha sala laran maibe sira mos aprende barak liu iha sira nia ambiente.
